Bengaluru : రూ.8 లక్షల లంచం తీసుకుంటూ సెంట్రల్ జీఎస్టీ అధికారి లోకాయుక్త అధికారులకు పట్టుబడ్డారు. బెంగళూరు సిటీ లోకాయుక్త నిర్వహించిన ట్రాప్‌ ఆపరేషన్‌లో ఈ ఘటన చోటుచేసుకుంది. లంచం తీసుకుంటున్న దృశ్యాలు కెమెరాలో కూడా రికార్డైనట్లు అధికారులు తెలిపారు. లోకాయుక్త తెలిపిన వివరాల ప్రకారం.. మోహిత్ ప్రతాప్ సింగ్‌ సెంట్రల్ జీఎస్టీ సౌత్ డివిజన్-4, సౌత్ కమిషనరేట్‌లో సూపరింటెండెంట్‌గా పనిచేస్తున్నారు. పెండింగ్‌లో ఉన్న సెంట్రల్ జీఎస్టీ బకాయిలకు సంబంధించిన వ్యవహారంలో ఓ వ్యాపారిని రూ.8 లక్షలు లంచంగా ఇవ్వాలని ఆయన డిమాండ్‌ చేసినట్లు ఆరోపణలు ఉన్నాయి.
తనపై నమోదైన తప్పుడు ఫిర్యాదును క్లోజ్‌ చేసేందుకు ఈ డబ్బు ఇవ్వాలని అధికారి అడిగినట్లు ఫిర్యాదుదారు సయ్యద్ జమీర్‌ లోకాయుక్తకు ఫిర్యాదు చేశారు. ఫిర్యాదు అందుకున్న అధికారులు.. సింగ్‌ను రెడ్‌హ్యాండెడ్‌గా పట్టుకునేందుకు ట్రాప్‌ ఆపరేషన్‌ చేపట్టారు. ఈ క్రమంలో ఓ మధ్యవర్తి ద్వారా సింగ్‌ లంచం తీసుకుంటున్న సమయంలో లోకాయుక్త అధికారులు పట్టుకున్నట్లు తెలిపారు. సల్మాన్‌ షేక్‌ అనే ప్రైవేట్ వ్యక్తి ఈ లావాదేవీలో మధ్యవర్తిగా వ్యవహరించినట్లు అధికారులు గుర్తించారు. ఈ కేసులో సల్మాన్‌ షేక్‌ను కూడా నిందితుడిగా చేర్చారు.
బెంగళూరులోని కోరమంగళలో ఉన్న కేంద్రీయ సదన్‌లో సింగ్‌ ఛాంబర్‌లోనే లంచం తీసుకున్నట్లు లోకాయుక్త అధికారులు వెల్లడించారు. అక్కడే ట్రాప్‌ ఆపరేషన్‌ నిర్వహించి సింగ్‌ను అదుపులోకి తీసుకున్నట్లు తెలిపారు. ఈ ఘటనపై 2018లో సవరించిన అవినీతి నిరోధక చట్టం, 1988లోని సెక్షన్‌ 7A కింద కేసు నమోదు చేశారు. కేసుకు సంబంధించి మరింత దర్యాప్తు కొనసాగుతోందని లోకాయుక్త అధికారులు తెలిపారు.
