Donald Trump : అమెరికా అధ్యక్షుడు డొనాల్డ్ ట్రంప్ మరో కొత్త కార్యక్రమాన్ని ప్రారంభించారు. వైట్ హౌస్ నుంచి 24 గంటల పాటు ప్రసారం అయ్యే ట్రంప్ టీవీని ప్రారంభించారు. ఇందులో ట్రంప్ ప్రసంగాలు, ప్రభుత్వ ప్రకటనలు, ముఖ్యమైన కార్యక్రమాలకు సంబంధించిన వీడియోలను ప్రసారం చేస్తున్నారు. ప్రస్తుతం అమెరికా ప్రభుత్వం, కొన్ని ప్రముఖ మీడియా సంస్థల మధ్య వివాదం కొనసాగుతున్న సమయంలో ఈ కొత్త ప్రసారం ప్రారంభించడం ఆసక్తిగా మారింది. అయితే ట్రంప్ టీవీ పేరుతో ప్రత్యేకంగా కొత్త టీవీ ఛానల్‌ను ప్రారంభించలేదు. ఇది వైట్ హౌస్ అధికారిక యూట్యూబ్ ఛానల్‌లో నిరంతరం జరిగే లైవ్ ప్రసారం మాత్రమే. ఇప్పటికే ఉన్న వీడియోలతో పాటు కొత్తగా వచ్చే ప్రసంగాలు, ప్రకటనలు, ప్రభుత్వ కార్యక్రమాల వీడియోలను ఇందులో ప్రసారం చేస్తారు. ఈ ప్రసారం 24 గంటలూ కొనసాగుతుంది.
Also Read : చంద్రుడు మాదే.. ట్రంప్ సంచలన కామెంట్స్‌.. అమెరికా చట్టం ఏం చెబుతోంది?
అమెరికా కాలమానం ప్రకారం సోమవారం రాత్రి 7 గంటలకు ఈ లైవ్ ప్రసారం మొదలైంది. మొదటగా అమెరికా 250వ వార్షికోత్సవం సందర్భంగా మౌంట్ రష్‌మోర్ వద్ద ట్రంప్ చేసిన ప్రసంగాన్ని ప్రసారం చేశారు. ఆ తర్వాత ట్రంప్ ప్రభుత్వం, వైట్ హౌస్‌కు సంబంధించిన ఇతర ముఖ్యమైన వీడియోలను ప్రసారం చేస్తున్నారు. ఈ ట్రంప్ టీవీని ఎవరైనా ఉచితంగా చూడవచ్చు. ఇందుకోసం ప్రత్యేకంగా డబ్బులు చెల్లించాల్సిన అవసరం లేదు. వైట్ హౌస్ అధికారిక యూట్యూబ్ ఛానల్‌లో ఈ ప్రసారాన్ని చూడొచ్చు. వైట్ హౌస్ వెబ్‌సైట్‌లో కూడా ఇదే లైవ్ ప్రసారాన్ని అందుబాటులో ఉంచారు. ప్రత్యేక యాప్ లేదా టీవీ కనెక్షన్ అవసరం లేదు. కాగా ఇటీవల ట్రంప్ ప్రభుత్వం మీడియా సంస్థలకు చెందిన రిపోర్టర్లు, ఫొటోగ్రాఫర్లపై వైట్ హౌస్‌లో ఆంక్షలు విధించింది. మీడియా సంస్థలు తప్పుడు వార్తలు ప్రచురిస్తున్నాయని ట్రంప్ ఆరోపించారు. దీంతో మీడియా సంస్థలు కోర్టును ఆశ్రయించాయి. తమ వార్తలను ప్రభుత్వం విమర్శించినందుకే తమపై చర్యలు తీసుకుందని అవి ఆరోపించాయి.
మరోవైపు మీడియాపై తీసుకున్న చర్యలను ట్రంప్ ప్రభుత్వం సమర్థించుకుంది. మీడియాకు వార్తలు ప్రచురించే హక్కు ఉందని, కానీ ప్రతి మీడియా సంస్థకు ఎప్పటికీ వైట్ హౌస్‌లో ప్రెస్ పాస్ లేదా బ్రీఫింగ్ రూమ్‌లో స్థానం ఇవ్వాల్సిన అవసరం లేదని ప్రభుత్వం చెబుతోంది. ట్రంప్ కూడా తన సోషల్ మీడియా ఖాతాలో మీడియా సంస్థలపై విమర్శలు కొనసాగించారు. మొత్తానికి ట్రంప్ టీవీ అనేది కొత్త టీవీ ఛానల్ కాదు. వైట్ హౌస్ అధికారిక యూట్యూబ్‌లో 24 గంటలూ ప్రసారం అయ్యే లైవ్ వీడియో. ట్రంప్ ప్రభుత్వం చేపట్టే కార్యక్రమాలు, ప్రసంగాలు, ప్రకటనలను నేరుగా ప్రజలకు చూపించడమే దీని ప్రధాన ఉద్దేశంగా కనిపిస్తోంది. అయితే మీడియాతో ట్రంప్ ప్రభుత్వానికి వివాదం కొనసాగుతున్న సమయంలో ఇది ప్రారంభం కావడంతో ఈ ‘ట్రంప్ టీవీ’ ఇప్పుడు అమెరికాలో చర్చనీయాంశంగా మారింది.
Also Read : రష్యా ఎన్నికల్లో పుతిన్ పార్టీకి భారీ విజయం.. 57.83 శాతం ఓట్లతో గ్రాండ్ విక్టరీ!
