రష్యాలో పార్లమెంట్ ఎన్నికలు పూర్తయ్యాయి. ఫలితాలు కూడా వచ్చేశాయి. పుతిన్ యునైటెడ్ రష్యా పార్టీ.. మరోసారి భారీ విజయం సాధించింది. రష్యా పార్లమెంట్‌లో మొత్తం 450 స్థానాలు ఉంటే.. యునైటెడ్ రష్యా ఏకంగా 355 సీట్లు గెలుచుకుంది. అంటే దాదాపు 80 శాతం స్థానాల్లో పుతిన్ పార్టీ జెండా రెపరెపలాడింది. 2021 ఎన్నికల్లో యునైటెడ్ రష్యాకు 49.8 శాతం ఓట్లు వచ్చాయి. ఈసారి ఏకంగా 57.83 శాతం ఓట్లు పడ్డాయి. రష్యా ఎన్నికల కమిషన్ లెక్కలు కూడా ఇదే చెప్తున్నాయి. తాజా విజయంతో పుతిన్ రాజకీయంగా మరింత బలపడ్డారు. ఓట్ల శాతం పెరిగింది. సీట్ల సంఖ్య కూడా రికార్డు స్థాయికి చేరింది. కానీ, ఇక్కడే అసలు ప్రశ్న మొదలవుతుంది. ఈ విజయం పుతిన్‌కు ఎందుకు ముఖ్యం? అనే ప్రశ్నను డీప్‌గా డిస్కస్‌ చేద్దాం. ఉక్రెయిన్‌తో యుద్ధం దాదాపు ఐదో సంవత్సరంలోకి వెళ్లిపోయింది. యుద్ధం కొనసాగుతున్న కొద్దీ.. రష్యాపై ఖర్చు, సైనిక భారం కూడా పెరుగుతూనే ఉంటుంది.
అదే సమయంలో ఉక్రెయిన్ డ్రోన్ దాడులు రష్యాలోపల కూడా పెరిగాయి. చమురు రిఫైనరీలపై దాడుల కారణంగా కొన్ని ప్రాంతాల్లో ఇంధన సమస్యలు కూడా వచ్చాయి. అంటే యుద్ధ ప్రభావం ఇప్పుడు రష్యా ప్రజల రోజువారీ జీవితంలో కూడా కనిపిస్తోంది. అలాంటి సమయంలో జరిగిన ఈ ఎన్నికల్లో ఇంత భారీ మెజారిటీ రావడం.. పుతిన్‌కు మరింతగా రాజకీయంగా ఉపయోగపడే అంశంగా మారింది. ఎందుకంటే.. ఈ ఫలితాలను చూపిస్తూ పుతిన్ ఒక మాట గట్టిగా చెప్పొచ్చు. యుద్ధం కొనసాగుతున్నా.. తమ ప్రభుత్వానికి ప్రజల్లో ఇంకా మద్దతు ఉందని పుతిన్ చెప్పుకునే అవకాశం వచ్చింది. ముఖ్యంగా ఉక్రెయిన్ యుద్ధం విషయంలో ఇది పుతిన్‌కు ఉపయోగపడొచ్చు. ఇప్పుడు తన పార్టీ భారీగా గెలవడంతో.. రష్యా ప్రజలు తమ ప్రభుత్వ నిర్ణయాలను వ్యతిరేకించడం లేదని పుతిన్ చెప్పుకునే అవకాశం వచ్చింది.
కానీ ఇక్కడ ఒక విషయం గుర్తుపెట్టుకోవాలి. ఈ ఎన్నికల ఫలితాలనే రష్యా ప్రజలందరి అభిప్రాయంగా చూడటం కరెక్ట్ కాదు. ఎందుకంటే.. రష్యా ఎన్నికలపై అంతర్జాతీయంగా, స్వతంత్ర సంస్థల నుంచి విమర్శలు వచ్చాయి. యుద్ధాన్ని వ్యతిరేకించే కొంతమంది నాయకులు ఎన్నికల్లో పోటీ చేయలేకపోయారు. యుద్ధాన్ని వ్యతిరేకించే యాబ్లోకో పార్టీ కూడా పార్లమెంట్ ఎన్నికల్లో పోటీ చేయలేదు. అంతేకాదు.. OSCE పరిశీలకులు కూడా ఈ ఎన్నికలను పర్యవేక్షించలేదు. కాబట్టి.. ఈ ఫలితం పుతిన్‌కు రాజకీయంగా బలం ఇచ్చినప్పటికీ.. రష్యా ప్రజలందరూ పుతిన్‌కు మద్దతు ఇచ్చారని చెప్పడం మాత్రం కరెక్ట్ కాదు. అయితే.. ఈ విజయం పుతిన్‌కు ఇచ్చే పెద్ద లాభం ఏంటంటే.. దేశంలో తన రాజకీయ పట్టును మరింత బలంగా కొనసాగించే అవకాశం రావడం. 450 సీట్లలో 355 సీట్లు అంటే చాలా పెద్ద మెజారిటీ. దీంతో ఇకపై పుతిన్ ప్రభుత్వం తీసుకొచ్చే కీలక చట్టాలకు పార్లమెంట్‌లో పెద్దగా అడ్డంకులు ఉండకపోవచ్చు.
Also Read : ఇరాన్‌లో ‘CODE 100’.. ట్రంప్ ఎమర్జెన్సీ రిటర్న్..
యునైటెడ్ రష్యాకు పార్లమెంట్‌లో మెజారిటీ మరింత పెరిగింది. అంటే.. యుద్ధానికి సంబంధించి పుతిన్ తీసుకునే నిర్ణయాలను అడ్డుకునే రాజకీయ ఒత్తిడి పెద్దగా ఉండకపోవచ్చు. ఇది ఉక్రెయిన్ యుద్ధానికి ఎలా ఉపయోగపడుతుంది?. ఇదే అసలు జియోపాలిటిక్స్. ఒక దేశంలో యుద్ధం జరుగుతున్నప్పుడు.. రాజకీయంగా ప్రభుత్వం బలహీనంగా ఉంటే.. యుద్ధాన్ని ఎక్కువకాలం కొనసాగించడం కష్టం అవుతుంది. ఎందుకంటే ప్రజలపై ఖర్చు పెరుగుతుంది. సైన్యానికి ఎక్కువ డబ్బు కావాలి. ఆర్థిక వ్యవస్థపై ఒత్తిడి పెరుగుతుంది. సైనికుల కుటుంబాల నుంచి క్వశ్చన్స్‌ రైజ్ అవుతాయి. యుద్ధంలో ప్రాణనష్టం పెరిగితే పుతిన్‌పై పొలిటికల్ ప్రెషర్ పెరగొచ్చు. కానీ పుతిన్‌కు ఇప్పుడు పార్లమెంట్‌లో మరింత బలమైన రాజకీయ మద్దతు పెరిగింది. అంటే.. యుద్ధం విషయంలో ప్రభుత్వం తీసుకునే నిర్ణయాలకు పార్లమెంట్ నుంచి పెద్దగా అడ్డంకులు ఉండకపోవచ్చు. అయితే.. దీన్ని బట్టి ఉక్రెయిన్ యుద్ధంలో రష్యా ఈజీగా గెలుస్తుందని ఇప్పుడే చెప్పలేం. ఎందుకంటే.. యుద్ధంలో గెలుపు కేవలం రాజకీయ బలంపై ఆధారపడదు.
రష్యా దగ్గర ఎంతమంది సైనికులు ఉన్నారు. ఎన్ని ఆయుధాలు తయారు చేయగలుగుతోంది. ఎన్ని డ్రోన్లు, క్షిపణులు అందుబాటులో ఉన్నాయి. యుద్ధానికి ఎంత డబ్బు ఖర్చు చేయగలుగుతోంది. ఇంధనం ఎంత అందుబాటులో ఉంది. ఇవన్నీ కూడా చాలా ముఖ్యం. ఇక్కడే రష్యాకు మరో పెద్ద సమస్య ఎదురవుతోంది. అదే.. ఆర్థిక భారం. రష్యా ప్రస్తుతం యుద్ధం కోసం భారీగా డబ్బు ఖర్చు చేస్తోంది. 2026లో రష్యా బడ్జెట్ లోటు GDPలో దాదాపు 3 శాతానికి చేరొచ్చని ఆ దేశ ఆర్థిక మంత్రి చెప్పారు. ఇదే ప్రభుత్వం మొదట 1.6 శాతం లోటు ఉంటుందని అంచనా వేసింది. అంటే.. యుద్ధ ఖర్చులు పెరగడంతో రష్యా ప్రభుత్వంపై ఆర్థిక భారం కూడా పెరుగుతోంది. అదే సమయంలో రష్యా ఆర్థిక వ్యవస్థ పూర్తిగా కుప్పకూలిపోయిందని కూడా చెప్పలేం. చమురు ఆదాయం రష్యాకు ఇంకా కీలకంగా ఉంది. మిడిల్‌ఈస్ట్ వార్‌తో ఇంధన ధరలు ఎక్కువగా ఉండటం కూడా రష్యా ఆదాయానికి కాస్త కలిసొచ్చింది. అందుకే.. రష్యా ప్రస్తుతం యుద్ధ ఖర్చులను భరించగలుగుతోంది. కానీ దీర్ఘకాలంలో పరిస్థితి అంత సులభంగా ఉండదని ఫైనాన్షియల్ ఎక్స్‌పర్ట్స్‌ వార్న్ చేస్తున్నారు.
కార్మికుల కొరత పెరుగుతున్న అప్పులు.. అధిక వడ్డీ రేట్లు.. పెట్టుబడులపై ఒత్తిడి.. టెక్నాలజీ రంగంపై ఆంక్షల ప్రభావం.. ఇవన్నీ రాబోయే రోజుల్లో రష్యాకు సమస్యలు తెచ్చే అవకాశం ఉంది. ఇక.. యునైటెడ్ రష్యా విజయం పుతిన్‌కు మరో విధంగానూ ఉపయోగపడొచ్చు. యుద్ధం కొనసాగించడానికి ప్రభుత్వం మరింత డబ్బు ఖర్చు చేయాల్సి రావచ్చు. సైనిక ఉత్పత్తి పెంచాల్సి రావచ్చు. కొత్తగా సైనికులను కూడా తీసుకోవాల్సి ఉంటుంది. ఇలాంటి కఠిన నిర్ణయాలు తీసుకోవాల్సి వస్తే.. “ఎన్నికల్లో ప్రజలు మాకు మద్దతు ఇచ్చారు” అని చెబుతూ ఆ నిర్ణయాలను పుతిన్ సమర్థించుకునే అవకాశం ఉంటుంది. అంటే.. “ప్రజలు మా విధానాన్ని తిరస్కరించలేదు.” అనే రాజకీయ వాదనను ముందుకు తీసుకెళ్లే అవకాశం పుతిన్‌కు ఉంది. అయితే.. ఇక్కడ మరో ముఖ్యమైన విషయం ఉంది. ఎన్నికల తర్వాత కొత్త పార్లమెంట్‌లో.. ఉక్రెయిన్ యుద్ధంలో పాల్గొన్న మాజీ సైనికులు కూడా పెద్ద సంఖ్యలోకి వస్తున్నారు.
తాజా లెక్కల ప్రకారం.. దాదాపు 49 మంది యుద్ధ అనుభవం ఉన్న వ్యక్తులు డ్యూమాలోకి వస్తున్నారు. డ్యూమా అంటే రష్యా పార్లమెంట్ దిగువసభ. పుతిన్ కూడా.. యుద్ధంలో పాల్గొన్న సైనికులను భవిష్యత్తులో రాజకీయాల్లోకి తీసుకురావడంపై ఫోకస్డ్‌గా ఉన్నారు. దీంతో.. రష్యా రాజకీయాల్లో మాజీ సైనికుల పాత్ర రాబోయే రోజుల్లో మరింత పెరిగే అవకాశం ఉంది. ఇది ఎందుకు ముఖ్యమంటే.. యుద్ధం ఎప్పుడు ముగిసినా.. అందులో పాల్గొన్న వేలాది మంది సైనికులు మళ్లీ సాధారణ జీవితంలోకి వస్తారు. వాళ్లకు ఉద్యోగాలు కావాలి. రాజకీయాల్లో తమకు చోటు కావాలి. ప్రభుత్వంలో కూడా తమకు పాత్ర ఉండాలని కోరుకుంటారు. అందుకే.. యుద్ధం ముగిసిన తర్వాత కూడా ఈ సైనికుల ప్రభావం రష్యా రాజకీయాల్లో కొనసాగించే అవకాశం ఉంది. పుతిన్ ఇప్పటి నుంచే వాళ్లను రాజకీయ వ్యవస్థలోకి తీసుకురావడం ద్వారా.. భవిష్యత్తులో ఒక కొత్త రాజకీయ బేస్‌ను తయారు చేసే ప్రయత్నం చేస్తున్నట్టు అనలిస్టులు విశ్లేషిస్తున్నారు. అంటే యుద్ధం కేవలం రష్యా విదేశాంగ విధానాన్నే మార్చడం కాదు.. రష్యా లోపలి రాజకీయ వ్యవస్థను కూడా మార్చే అవకాశం ఉంది. ఇప్పుడు మరో కీలకమైన అంశం.. అమెరికా.
రష్యా-ఉక్రెయిన్ యుద్ధాన్ని ఆపడానికి అమెరికా చాన్నాళ్లు నుంచి శ్రమిస్తోంది. ఒకవైపు రష్యాపై ఆర్థిక ఒత్తిడి పెంచాలని చూస్తోంది. మరోవైపు రష్యా, ఉక్రెయిన్ మధ్య చర్చలు జరగాలని ప్రయత్నాలు చేస్తోంది. కానీ.. ఇక్కడ పుతిన్‌కు ఒక సమస్య కూడా ఉంది. దేశంలో రాజకీయంగా తన బలం పెరిగినప్పుడు.. యుద్ధాన్ని ఆపేందుకు ఏదైనా రాజీ నిర్ణయం తీసుకోవాల్సి వస్తే.. పుతిన్‌పై దేశంలో నుంచి వచ్చే రాజకీయ ఒత్తిడి తక్కువగా ఉండొచ్చు. అంటే.. ఈ ఎన్నికల విజయం పుతిన్‌కు ఉక్రెయిన్‌తో చర్చల్లో కూడా కొంత రాజకీయ బలం ఇవ్వొచ్చు. అయితే.. దీన్ని బట్టి పుతిన్ వెంటనే యుద్ధాన్ని ఆపేస్తారని చెప్పలేం. అలాగే.. యుద్ధాన్ని ఖచ్చితంగా కొనసాగిస్తారని కూడా చెప్పలేం. ఎందుకంటే.. యుద్ధం ఎలా సాగుతోంది. అమెరికా నుంచి ఎంత ఒత్తిడి వస్తోంది. ఉక్రెయిన్ వైఖరి ఏంటి.. రష్యా ఆర్థిక పరిస్థితి ఎలా ఉంది.. వీటన్నింటిని బట్టి పుతిన్ తదుపరి నిర్ణయం మారొచ్చు.
Also Read : ఇక ఇరాన్‌ విమానాలు ఎగరవు… గ్లోబల్‌ షట్‌డౌన్‌ ప్రకటించిన అమెరికా
ఇక్కడ మరో ఆసక్తికరమైన విషయం ఉంది. రష్యా తన ఎన్నికలను ప్రపంచానికి ఎలా చూపించుకుంటుందన్నది కూడా ఇప్పుడు కీలకంగా మారింది. పుతిన్ తరచూ.. ఉక్రెయిన్‌లో ఎన్నికలు ఎందుకు జరగడం లేదని ప్రశ్నిస్తుంటారు. యుద్ధం జరుగుతున్న కారణంగా.. ఉక్రెయిన్‌లో ఎన్నికలు వాయిదా పడ్డాయి. అదే సమయంలో.. రష్యాలో కూడా యుద్ధం జరుగుతున్నా పార్లమెంట్ ఎన్నికలు జరిగాయి. దీంతో రష్యా.. “యుద్ధం జరుగుతున్నా మా దేశంలో ఎన్నికలు జరిగాయి” అని ప్రపంచానికి చెప్పుకునే అవకాశం వచ్చింది. ఇది పుతిన్‌కు అంతర్జాతీయంగా ఒక రాజకీయ వాదనగా ఉపయోగపడొచ్చు. కానీ.. రష్యా ఎన్నికలపై మరోవైపు విమర్శలు కూడా ఉన్నాయి. పాశ్చాత్య దేశాలు, ఎన్నికలను పరిశీలించే సంస్థలు.. ఎన్నికల స్వేచ్ఛ, ప్రతిపక్షాలకు ఉన్న అవకాశాలు, ఎన్నికల పర్యవేక్షణపై ప్రశ్నలు లేవనెత్తుతున్నాయి. అంటే.. ఈ ఎన్నికలపై రెండు రకాల వాదనలు ఉన్నాయి. రష్యా మాత్రం.. ఈ ఫలితాలను ప్రజల మద్దతుగా చూపించుకోవచ్చు.
కానీ.. ఇతర దేశాల్లోని పరిశీలకులు మాత్రం.. ప్రతిపక్షాలకు ఉన్న పరిమితులు, ఎన్నికల వాతావరణం కారణంగా ఈ ఫలితాలను ప్రశ్నిస్తున్నారు. ఇప్పుడు అసలు ప్రశ్న ఏంటంటే.. ఈ ఎన్నికల విజయం పుతిన్ యుద్ధంపై తీసుకునే నిర్ణయాలను ఎలా ప్రభావితం చేస్తుంది?.. దీనికి ఇప్పుడే ఖచ్చితమైన సమాధానం చెప్పడం కష్టం. కానీ.. ఒక విషయం మాత్రం క్లియర్. దేశంలో తన రాజకీయ బలం.. బలంగానే ఉందని చెప్పుకోవడానికి ఈ ఫలితం పుతిన్‌కు ఉపయోగపడుతుంది. దీంతో.. ఉక్రెయిన్‌తో చర్చలు జరిగినప్పుడు రష్యా తన డిమాండ్లను మరింత గట్టిగా ముందుకు తీసుకెళ్లే అవకాశం ఉండొచ్చు. అయితే.. మరోవైపు యుద్ధం వల్ల రష్యాపై ఆర్థిక భారం కూడా పెరుగుతోంది. అంటే.. పుతిన్‌కు రాజకీయ బలం పెరుగుతోంది. అదే సమయంలో.. యుద్ధం ఖర్చు కూడా పెరుగుతోంది. ఇదే ఇప్పుడు పుతిన్ ముందున్న అసలు సవాలు. రష్యా ఇప్పటికీ యుద్ధాన్ని కొనసాగిస్తోంది. కానీ… ఇదే స్థాయిలో యుద్ధాన్ని ఎక్కువకాలం కొనసాగించాలంటే రష్యా ఆర్థిక వ్యవస్థపై మరింత భారం పడుతుంది.
ఇంధనం నుంచి వచ్చే ఆదాయం ఎంతకాలం బలంగా ఉంటుంది?.. ఆంక్షలు ఎంతకాలం కొనసాగుతాయి?.. రష్యా సైన్యం కోసం అవసరమైన ఆయుధాలను ఇదే స్థాయిలో ఎంతకాలం తయారు చేయగలదు?.. సైనికుల కొరతను రష్యా ఎలా ఎదుర్కొంటుంది?.. ఇలాంటి ప్రశ్నలకు సమాధానాలు చాలా కీలకం. అందుకే.. యునైటెడ్ రష్యా విజయం కేవలం ఒక ఎన్నికల ఫలితం మాత్రమే కాదు. పుతిన్‌కు ఇది మూడు రకాలుగా ఉపయోగపడొచ్చు. మొదటిది.. దేశంలో తన రాజకీయ బలాన్ని మరింత చూపించుకోవచ్చు. రెండోది.. యుద్ధానికి సంబంధించి ప్రభుత్వం తీసుకునే నిర్ణయాలకు పార్లమెంట్‌లో పెద్దగా అడ్డంకులు ఉండకపోవచ్చు. మూడోది.. అమెరికా, ఉక్రెయిన్‌తో చర్చలు జరిగేటప్పుడు.. రష్యాలో తన రాజకీయ స్థానం బలంగానే ఉందని పుతిన్ చెప్పుకోవచ్చు. కానీ.. మరోవైపు సమస్యలు కూడా ఉన్నాయి. యుద్ధం ఖర్చు పెరుగుతోంది. ప్రభుత్వ బడ్జెట్‌పై ఒత్తిడి పెరుగుతోంది. ఇంధనం, పరిశ్రమ, కార్మికుల కొరత వంటి సమస్యలు కూడా ఉన్నాయి. అంటే.. పుతిన్‌కు రాజకీయ బలం పెరిగింది. కానీ.. యుద్ధం భారం కూడా పెరుగుతోంది. ఇక ముందు అసలు పరీక్ష.. ఎన్నికల్లో కాదు. పార్లమెంట్‌లో కాదు. యుద్ధభూమిలో.. ఆర్థిక వ్యవస్థలో.. అంతర్జాతీయ చర్చల్లో.. అక్కడే ఉంటుంది. ఉక్రెయిన్ యుద్ధంలో రష్యా తన లక్ష్యాలను ఎంతవరకు సాధిస్తుంది?.. అమెరికా ఒత్తిడిని పుతిన్ ఎలా ఎదుర్కొంటారు?.. ఈ యుద్ధం వల్ల వస్తున్న ఆర్థిక భారాన్ని రష్యా ఎంతకాలం మోయగలదు?.. ఈ ప్రశ్నలకు వచ్చే సమాధానాలే.. ఈ ఎన్నికల విజయంతో పుతిన్‌కు వచ్చిన రాజకీయ బలం ఎంతవరకు ఉపయోగపడుతుందో నిర్ణయిస్తాయి.
ఇప్పటికైతే మాత్రం ఒక విషయం స్పష్టం. యునైటెడ్ రష్యా భారీ విజయం.. పుతిన్‌కు దేశంలో రాజకీయంగా మరింత బలం ఇచ్చింది. ఆ బలాన్ని ఉక్రెయిన్ యుద్ధంలో పుతిన్ ఎలా ఉపయోగిస్తారన్నది.. ఇప్పుడు మిలియన్ డాలర్ల ప్రశ్నగా మిగిలిపోయింది.
