Bihar : బిహార్‌లో మహిళలు, బాలికలపై వేధింపులకు సంబంధించిన మరో ఘటన వెలుగులోకి వచ్చింది. జముయ్‌లో కెమెరా ముందు బాలికను వేధించిన ఘటన జరిగిన కొద్ది రోజులకే సమస్తిపూర్‌లో కూడా ఇలాంటి ఘటన చోటుచేసుకుంది. ఈ ఘటనకు సంబంధించిన వీడియో సోషల్‌ మీడియాలో వైరల్‌గా మారింది. ఇంతకు ఏం జరిగిందంటే.. సమస్తిపూర్‌లోని జగత్‌సింగ్‌పూర్‌ గ్రామంలో ఈ ఘటన జరిగినట్లు పోలీసులు తెలిపారు. ఓ బాలిక, ఆమెతో కలిసి ప్రయాణిస్తున్న ఓ బాలుడిని కొందరు వ్యక్తులు బైకుపై వచ్చి చుట్టుముట్టారు. బాలికను తిడుతూ ఆమెను రోడ్డుపైకి నెట్టుతూ వేధించినట్లు వీడియోలో కనిపించింది. బాలిక, బాలుడు రోడ్డుపై ఆగి ఫొటోలు తీసుకుంటుండగా కొందరు స్థానికులు అక్కడికి వచ్చినట్లు స్థానిక సమాచారం. వారిని చుట్టుముట్టిన యువకులు బాలికను అసభ్యంగా దూషిస్తూ వేధింపులకు పాల్పడ్డారు. వైరల్‌గా మారిన వీడియోలో కనిపిస్తున్న వారంతా జగత్‌సింగ్‌పూర్‌ గ్రామానికి చెందినవారేనని స్థానికులు చెబుతున్నారు.
Also Read : NEET PG ఫలితాలు విడుదల!
ఈ వీడియోను చూసిన వెంటనే పోలీసులు చర్యలు ప్రారంభించారు. ఈ ఘటనకు సంబంధించి నలుగురు నిందితులను అరెస్టు చేసినట్లు ఓ సీనియర్‌ పోలీసు అధికారి తెలిపారు. కేసు నమోదు చేసి దర్యాప్తు చేస్తున్నట్లు చెప్పారు. జగత్‌సింగ్‌పూర్‌ ప్రాంతంలో పగటిపూట బాలికను కొందరు వ్యక్తులు వేధిస్తున్న వీడియో వైరల్ కావడంతో నలుగురిని అరెస్టు చేసి ఎఫ్‌ఐఆర్‌ నమోదు చేసినట్లు పోలీసు అధికారి వెల్లడించారు. ఈ ఘటనపై జనతాదళ్‌ (యునైటెడ్‌) నేత రాజీవ్‌ రంజన్‌ తీవ్రంగా ఖండించారు. ఇలాంటి నేరాలకు పాల్పడే వారు జముయ్‌ ఘటనలో జరిగిన పోలీసు చర్యలను చూసి కూడా హెచ్చరికగా తీసుకోకపోతే, చివరికి జైలుకు వెళ్లాల్సి వస్తుందని ఆయన అన్నారు.
కొద్ది రోజుల క్రితం బిహార్‌లోని జముయ్‌లో కూడా ఇలాంటి ఘటన జరిగింది. పదో తరగతి చదువుతున్న బాలుడు, బాలికను కొందరు వ్యక్తులు వేధించిన వీడియో సోషల్‌ మీడియాలో వైరల్ కావడంతో ముగ్గురిని పోలీసులు అరెస్టు చేశారు. ఆ వీడియోపై పలువురు సోషల్‌ మీడియా వినియోగదారులు బిహార్‌ పోలీసులను ట్యాగ్‌ చేసి నిందితులపై చర్యలు తీసుకోవాలని కోరారు. జముయ్‌ ఘటనకు సంబంధించిన వీడియోలో బాలుడు, బాలికను కొందరు వ్యక్తులు చుట్టుముట్టారు. వారిలో ఒక వ్యక్తి బాలుడి చొక్కా కాలర్‌ పట్టుకుని బాలిక నుంచి అతడిని దూరంగా లాగాడు. బాలిక అక్కడి నుంచి పారిపోయేందుకు ప్రయత్నించగా, ముసుగు ధరించిన మరో వ్యక్తి ఆమెను వెనుక నుంచి పట్టుకున్నట్లు వీడియోలో కనిపించింది. ఈ ఇద్దరూ శనివారం సాయంత్రం కోచింగ్‌ క్లాసులకు వెళ్లి తిరిగి వస్తుండగా స్కూటర్‌పై బయటకు వెళ్లినట్లు పోలీసులు తెలిపారు. ఈ ఘటనపై దర్యాప్తు కొనసాగుతోంది.
Also Read : విడాకులు ఇచ్చినా భార్య ఖర్చులు భర్త చూసుకోవాల్సిందే.. అలహాబాద్ హైకోర్టు సంచలన తీర్పు!
