CM DK Shiva Kumar : కర్ణాటకలో ముఖ్యమంత్రి డీకే శివకుమార్ చేసిన వ్యాఖ్యలు రాజకీయంగా దుమారం రేపాయి. బెంగళూరుకు ఇతర ప్రాంతాల నుంచి వచ్చే ఎమ్మెల్యేల్లో కొంతమందికి రెండు పెళ్లిళ్లు ఉన్నాయని ఆయన చేసిన వ్యాఖ్యలపై బీజేపీ నేతలు తీవ్రంగా స్పందించారు. అలా రెండు పెళ్లిళ్లు చేసుకున్న ఎమ్మెల్యేల పేర్లు చెప్పాలని డిమాండ్ చేశారు.

కర్ణాటక అసెంబ్లీలో కరువు పరిస్థితులపై జరిగిన చర్చలో డీకే శివకుమార్ మాట్లాడారు. ఈ సందర్భంగా బెంగళూరు నగరంపై పెరుగుతున్న ఒత్తిడి గురించి ప్రస్తావించారు. నగర జనాభా వేగంగా పెరగడానికి ఇతర ప్రాంతాల నుంచి ప్రజలు బెంగళూరుకు వచ్చి ఇక్కడే ఉండిపోవడం కూడా ఒక కారణమని చెప్పారు.ఆ తర్వాత ఎమ్మెల్యేల గురించి మాట్లాడుతూ.. మీరు కూడా ఇక్కడికి వచ్చాక వెళ్లడం లేదు. ఈ నగరానికి వచ్చే వారిలో చాలామందికి రెండు పెళ్లిళ్లు ఉన్నాయి. అలాంటి వారు దాదాపు 12 మంది ఉన్నారు. నేను వారి జాబితా ఇవ్వగలను అని కామెంట్ చేశారు.

Also Read : అవినీతి చేసిన వారిని వదిలేది లేదు.. విజయ్‌ సంచలన వ్యాఖ్యలు!

బెంగళూరుకు వచ్చే లాయర్లు కూడా తమ సొంత ప్రాంతాలకు తిరిగి వెళ్లడం లేదని ఆయన అన్నారు. దీంతో నగర జనాభా వేగంగా పెరుగుతోందని చెప్పారు. బెంగళూరులో పట్టణ జనాభా 33 శాతం నుంచి 47 శాతానికి పెరిగిందని తెలిపారు. అయితే ఎమ్మెల్యేలకు రెండు పెళ్లిళ్లు ఉన్నాయంటూ శివకుమార్ చేసిన వ్యాఖ్యలపై రాజకీయ వర్గాల్లో, మీడియాలో చర్చ మొదలైంది. కర్ణాటక అసెంబ్లీలో ప్రతిపక్ష నేత ఆర్. అశోక్ శివకుమార్ వ్యాఖ్యలను అవసరం లేని వ్యాఖ్యలుగా పేర్కొన్నారు. రెండు పెళ్లిళ్లు చేసుకున్న ఎమ్మెల్యేల పేర్లు చెప్పాలని డిమాండ్ చేశారు.

ఇతర ప్రాంతాల నుంచి బెంగళూరుకు వచ్చిన ప్రతి ఎమ్మెల్యేపై ఇప్పుడు అనుమానం వచ్చే పరిస్థితి ఏర్పడింది అని అశోక్ అన్నారు. అయితే తనకు మాత్రం బెంగళూరుతోనే సంబంధం ఉందని, తాను ఇక్కడే పుట్టి పెరిగానని చెప్పారు. బీజేపీ సీనియర్ ఎమ్మెల్యే ఎస్. సురేష్ కుమార్ కూడా శివకుమార్ వ్యాఖ్యలను తప్పుబట్టారు. శివకుమార్ సరదాగా ఆ వ్యాఖ్యలు చేసి ఉండొచ్చని, కానీ అసెంబ్లీ వేదికపై ఇలాంటి మాటలు మాట్లాడటం సభ గౌరవాన్ని పెంచదని అన్నారు. తాను సభలో ఉండి ఉంటే వెంటనే స్పందించేవాడినని సురేష్ కుమార్ చెప్పారు. శివకుమార్ వ్యాఖ్యల వల్ల ప్రజల్లో అనవసరమైన ఆసక్తి ఏర్పడిందని అన్నారు.

రెండు పెళ్లిళ్లు చేసుకుని రెండు కుటుంబాలతో ఉంటున్న ఎమ్మెల్యేలు ఎవరనేది శివకుమార్ స్పష్టంగా చెప్పాలని ఆయన డిమాండ్ చేశారు. పేర్లు చెప్పకపోతే రాష్ట్ర ప్రజలు అన్ని పార్టీల ఎమ్మెల్యేలనూ అనుమానంతో చూడటం లేదా ఎగతాళి చేయడం జరిగే అవకాశం ఉందని సురేష్ కుమార్ అన్నారు.

Also Read : భర్త వేధింపులు భరించలేక.. బాల్కనీ నుంచి దూకి మహిళ మృతి!