Marriage : పంజాబ్‌లో ఓ ఆమ్‌ ఆద్మీ పార్టీ నేతను ఓ మహిళ మోసం చేసినట్లు ఆరోపణలు వచ్చాయి. తాను PCS అధికారినని చెప్పుకుని ఆయనను పెళ్లి చేసుకున్న మహిళ.. పెళ్లయిన కొన్ని నెలలకే బంగారం, వెండి నగలు, ఇతర విలువైన వస్తువులతో ఇంటి నుంచి వెళ్లిపోయినట్లు AAP నేత ఆరోపించారు. AAP జాయింట్‌ సెక్రటరీ అమరీందర్‌ సింగ్‌ మండోఫల్‌ ఈ మేరకు పోలీసులకు ఫిర్యాదు చేశారు. తనను పెళ్లి చేసుకున్న మన్‌విందర్‌ కౌర్‌ను ఆమె కుటుంబ సభ్యులు PCS అధికారిగా పరిచయం చేశారని, ఆమెకు అంతకుముందు పెళ్లి కాలేదని చెప్పారని ఆయన ఆరోపించారు. ఆమె తన వయసు విషయంలో కూడా తప్పుడు వివరాలు చెప్పినట్లు మండోఫల్‌ ఆరోపించారు.
Also Read : ఫ్లిప్‌కార్ట్ BBD సేల్‌.. VIVO ఫోన్లపై మైండ్ బ్లోయింగ్ డిస్కౌంట్స్.. బెస్ట్ మొబైల్స్ ఇవే..!
2026 ఫిబ్రవరిలో అమరీందర్‌ సింగ్‌ మన్‌విందర్‌ కౌర్‌ను పెళ్లి చేసుకున్నారు. ఈ పెళ్లికి పంజాబ్‌ అసెంబ్లీ స్పీకర్‌ కుల్తార్‌ సింగ్‌ సంధ్వాన్‌, కేబినెట్‌ మంత్రి తరుణ్‌ప్రీత్‌ సింగ్‌ సౌండ్‌తో పాటు పలువురు AAP నేతలు, ప్రజాప్రతినిధులు హాజరయ్యారు. పెళ్లి తర్వాత మన్‌విందర్‌ కౌర్‌ ఇంటి నుంచి బంగారం, వెండి నగలు, ఇతర విలువైన వస్తువులు తీసుకుని వెళ్లిపోయినట్లు మండోఫల్‌ ఆరోపించారు. ఆ తర్వాత ఆమె గురించి ఆరా తీసినప్పుడు అసలు విషయం తెలిసిందని ఆయన చెప్పారు. ఆమెకు అంతకుముందే పెళ్లి అయిందని, ఆ తర్వాత విడాకులు తీసుకున్నట్లు సమాచారం లభించిందని ఆరోపించారు. అంతేకాకుండా ఆమెకు 18 ఏళ్ల కుమారుడు కూడా ఉన్నాడని మండోఫల్‌ తెలిపారు. తప్పుడు గుర్తింపు, తప్పుదోవ పట్టించే వివరాలు చెప్పి తనను పెళ్లికి ఒప్పించారని AAP నేత ఆరోపించారు.
మండోఫల్‌ ఫిర్యాదుతో పోలీసులు మోసం, నకిలీ పత్రాలకు సంబంధించిన కేసు నమోదు చేశారు. మన్‌విందర్‌ కౌర్‌తో పాటు మొత్తం ఆరుగురిపై కేసు పెట్టారు. ఆమె సోదరుడు తార్లోచన్‌ సింగ్‌, తల్లి వరిందర్‌జిత్‌ కౌర్‌, బంధువు నరిందర్‌ సింగ్‌ గోల్డీ, వదిన రూపిందర్‌ కౌర్‌, మాజీ గ్రామ సర్పంచ్‌ సురిందర్‌ సింగ్‌ రాణా కూడా కేసులో నిందితులుగా ఉన్నారు. నిందితులంతా తరణ్‌తారణ్‌ జిల్లాలోని భిఖీవిండ్‌ పోలీస్‌ స్టేషన్‌ పరిధిలో ఉన్న సుర్‌ సింగ్‌ గ్రామానికి చెందినవారేనని పోలీసులు తెలిపారు.
ఈ ఘటనకు మరో కారణంతోనూ ప్రాధాన్యం ఏర్పడింది. 2026 ఫిబ్రవరిలో జరిగిన ఈ పెళ్లికి పలువురు AAP నేతలు, ప్రజాప్రతినిధులు హాజరయ్యారు. పెళ్లి వేడుకలకు సంబంధించిన ఫొటోలు, వీడియోలు కూడా బయటకు వచ్చాయి. వాటిలో రాజకీయ నాయకులు దంపతులతో కలిసి సంబరాల్లో పాల్గొనడం, భాంగ్రా చేయడం కనిపించింది. అమరీందర్‌ సింగ్‌ మండోఫల్‌ జిలా పరిషత్‌ సభ్యుడిగా కూడా ఉన్నారు. అలాగే మార్కెట్‌ కమిటీ సిర్హింద్‌ చైర్మన్‌గా పనిచేస్తున్నారు. పెళ్లి జరిగిన కొన్ని నెలల తర్వాత ఈ ఆరోపణలు బయటకు వచ్చాయి. ప్రస్తుతం పోలీసులు కేసుపై దర్యాప్తు చేస్తున్నారు. కేసులో పేరున్న నిందితులను గుర్తించి పట్టుకునేందుకు ప్రయత్నాలు కొనసాగుతున్నాయి.
Also Read : గుండెపగిలే విషాదం: అంబులెన్స్‌లో వస్తుండగా ఘోరం.. ఒకే కుటుంబంలో ముగ్గురు మృతి
