Netflix : ప్రముఖ ఓటీటీ సంస్థ నెట్ఫ్లిక్స్ ఉద్యోగాల కోతకు సిద్ధమైంది. సంస్థలో పనిచేస్తున్న ఉద్యోగుల్లో దాదాపు 5 శాతం మందిని తొలగించాలని ఆలోచనలో ఉంది. దీనిపై వచ్చే వారంలోనే ప్రకటన వచ్చే అవకాశం ఉంది. నెట్‌ఫ్లిక్స్‌లో ఈ ఏడాది షేర్ల ధర పడిపోవడం వంటి కారణాలతో సంస్థపై ఒత్తిడి పెరుగుతోంది. ఇదే జరిగితే గత నాలుగేళ్లలో నెట్‌ఫ్లిక్స్‌లో ఇదే అతిపెద్ద ఉద్యోగాల కోత అవుతుంది.
ప్రస్తుతం నెట్‌ఫ్లిక్స్‌లో ప్రపంచవ్యాప్తంగా దాదాపు 17 వేల మంది ఉద్యోగులు ఉన్నారు. ఈ లెక్కన సుమారు 850 మంది ఉద్యోగాలు కోల్పోయే అవకాశం ఉంది. అయితే, 2025 చివరి నాటికి తమ సంస్థలో దాదాపు 16 వేల మంది పూర్తిస్థాయి ఉద్యోగులు ఉన్నట్లు నెట్ఫ్లిక్స్ తన వార్షిక నివేదికలో తెలిపింది. ఈ లెక్క ప్రకారం సుమారు 800 మంది ఉద్యోగాలపై ప్రభావం పడవచ్చు. అయితే, ఏ విభాగాల్లో ఎక్కువ మందిని తొలగిస్తారనే విషయం ఇంకా స్పష్టంగా తెలియలేదు.
నెట్‌ఫ్లిక్స్‌లో చివరిసారిగా 2022లో భారీగా ఉద్యోగాల కోత జరిగింది. ఆ ఏడాది ఒకే మూడు నెలల కాలంలో సంస్థకు 2 లక్షల మంది సబ్‌స్క్రైబర్లు తగ్గిపోయారు. పదేళ్లకు పైగా కాలంలో తొలిసారి ఇలా జరిగింది. దీంతో అదే ఏడాది మే నెలలో సుమారు 150 మందిని, జూన్‌లో మరో 300 మందిని ఉద్యోగాల నుంచి తొలగించింది. ఆ తర్వాత కూడా కొద్దికొద్దిగా ఉద్యోగాల కోతలు కొనసాగాయి. ఈ ఏడాది ప్రారంభంలో సంస్థకు చెందిన గ్లోబల్ ప్రొడక్ట్ విభాగంలో కూడా పలువురి ఉద్యోగాలు పోయాయి.
గత ఏడాది కాలంలో నెట్ఫ్లిక్స్ షేర్ల ధర 40 శాతానికి పైగా పడిపోయింది. గత ఏడాది వార్నర్ బ్రదర్స్ సంస్థను కొనుగోలు చేసేందుకు నెట్ఫ్లిక్స్ చేసిన ప్రయత్నం విఫలం కావడం, 2026 తొలి ఆరు నెలల్లో ప్రేక్షకులు నెట్ఫ్లిక్స్ చూసే సమయం కేవలం 2 శాతమే పెరగడం కూడా సంస్థపై ఒత్తిడికి కారణంగా తెలుస్తోంది. మీడియా రంగంలో ఇప్పటికే పలు సంస్థలు ఉద్యోగులను తగ్గిస్తున్నాయి. డిస్నీ సంస్థ ఈ ఏడాది ఇప్పటివరకు మూడు సార్లు ఉద్యోగాల కోత చేపట్టింది. ఇదే సమయంలో నెట్ఫ్లిక్స్ కూడా ఖర్చులను తగ్గించుకునే దిశగా అడుగులు వేస్తున్నట్లు తెలుస్తోంది.
మరోవైపు నెట్ఫ్లిక్స్ ఆదాయం పెరుగుతున్నప్పటికీ, ఖర్చులు అంతకంటే వేగంగా పెరుగుతున్నాయి. ఈ ఏడాది ఏప్రిల్ నుంచి జూన్ వరకు మూడు నెలల్లో సంస్థ ఆదాయం 13 శాతం పెరిగి 12.6 బిలియన్ డాలర్లకు చేరింది. అయితే, కంటెంట్ తయారీకి కాకుండా మార్కెటింగ్, టెక్నాలజీ, ఇతర పరిపాలనా పనుల కోసం చేసే ఖర్చులు 18 శాతం పెరిగి సుమారు 2.3 బిలియన్ డాలర్లకు చేరాయి. టెక్నాలజీ, అభివృద్ధి విభాగాల ఖర్చులు ఒక్కటే 22 శాతం పెరిగాయి. ఇందులో ఉద్యోగుల జీతాలు, ఇతర సిబ్బంది ఖర్చులు 142 మిలియన్ డాలర్లు పెరగడం ప్రధాన కారణంగా ఉంది.
