మధ్యప్రాచ్యంలో జరుగుతున్న పరిణామాలు ఇప్పుడు సముద్ర మార్గాల భద్రతపై ఆందోళన ఏర్పడుతోంది. తాజాగా యూఏఈ తీర ప్రాంతం సమీపంలో ఓ టగ్‌బోట్‌పై జరిగిన దాడి సంచలనం సృష్టించింది. యూఏఈలోని ఖోర్ ఫక్కాన్ పోర్టుకు సమీపంలో సముద్ర జలాల్లో ప్రయాణిస్తున్న ఒక టగ్‌బోట్‌పై గుర్తుతెలియని రెండు ప్రమాదకరమైన పరికరాలు దూసుకొచ్చి ఢీకొట్టాయి. ఈ అనూహ్య ఘటనలో టగ్‌బోట్ తీవ్రంగా దెబ్బతిన్నట్లు యూకేఎమ్‌టీఓ తెలిపింది. అలాగే అందులో ప్రయాణిస్తున్న పలువురు సిబ్బంది తీవ్రంగా గాయపడినట్లు యూకేఎమ్‌టీఓ అధికారికంగా ధృవీకరించింది.
ఈ నేపథ్యంలో సముద్ర జలాల్లో సంచరించే వాణిజ్య నౌకలు, టగ్‌బోట్లు, ఇతర కంటైనర్లు తీవ్ర అప్రమత్తంగా ఉండాలని హెచ్చరికలు జారీ అయ్యాయి. ఏ చిన్న అనుమానాస్పద కార్యకలాపాలు కనిపించినా లేదా వింత కదలికలు ఎదురైనా వెంటనే సంబంధిత భద్రతా బలగాలకు సమాచారం అందించాలని నౌకల సిబ్బందికి సూచించారు. మరోవైపు ఈ ఘటనకు సరిగ్గా ముందు రోజు సౌదీ అరేబియాలోని అల్ జుబైల్ సమీపంలో కూడా ఇలాంటిదే మరో ఘటన చోటుచేసుకుంది. అక్కడ కూడా ఓ నౌకను గుర్తుతెలియని పరికరం బలంగా ఢీకొట్టింది. అయితే అదృష్టవశాత్తూ ఆ ఘటనలో నౌకలోని సిబ్బంది అందరూ ఎలాంటి ప్రాణనష్టం లేకుండా సురక్షితంగా బయటపడ్డారని సమాచారం. వరుసగా సముద్ర మార్గాల్లో నౌకలను లక్ష్యంగా చేసుకుని జరుగుతున్న ఈ దాడులు అంతర్జాతీయ వర్గాల్లో తీవ్ర ఆందోళన కలిగిస్తున్నాయి.
ఈ భయానక పరిస్థితుల నడుమ అమెరికా రాజకీయ, సైనిక వర్గాల నుంచి కీలకమైన ప్రకటనలు వెలువడ్డాయి. శనివారం సాయంత్రం అమెరికా ఉపాధ్యక్షుడు జేడీ వాన్స్ ప్రముఖ మీడియా సంస్థ సీబీఎస్ నిర్వహించిన టౌన్ హాల్ కార్యక్రమంలో పాల్గొని అమెరికా-ఇరాన్ ఘర్షణలపై సంచలన వ్యాఖ్యలు చేశారు. ఇరాన్ తీరు ప్రపంచ దేశాలకు పెను ముప్పుగా మారిందని ఆయన తీవ్రస్థాయిలో ధ్వజమెత్తారు. ప్రపంచవ్యాప్తంగా సాగుతున్న ఇంధన సరఫరా గొలుసును పూర్తిగా అడ్డుకోవాలని, సముద్ర మార్గాలను దిగ్బంధించాలని ఇరాన్ నిరంతరం ప్రయత్నిస్తోందని బహిరంగంగానే ఆరోపించారు.
ఈ సందర్భంగా హర్ముజ్ జలసంధి ప్రాముఖ్యతను జేడీ వాన్స్ ప్రత్యేకంగా ప్రస్తావించారు. ఒకవేళ అమెరికా నౌకాదళం గనుక రంగంలోకి దిగి హర్ముజ్ జలసంధి మార్గం ద్వారా చమురు, గ్యాస్ రవాణాను నిరంతరం కాపలా కాస్తూ ముందుకు నడిపించకపోయి ఉంటే.. ప్రపంచ మార్కెట్లో పెట్రోల్, డీజిల్ ధరలు ఇప్పుడు ఉన్నదాని కంటే ఏకంగా మూడు రెట్లు ఎక్కువగా ఉండేవని స్పష్టం చేశారు. అమెరికా నావికాదళం వ్యూహాత్మకంగా వ్యవహరించబట్టే ఇంధన ధరల విపరీతమైన పెరుగుదల నుంచి ప్రపంచ దేశాలు కొంతవరకు రక్షిస్తాయని తేల్చిచెప్పారు.
మరోవైపు ఈ దాడుల భయాల మధ్య అమెరికా సైన్యం కూడా ఓ కీలక ప్రకటనను విడుదల చేసింది. ప్రపంచ వాణిజ్యానికి అత్యంత కీలకమైన హోర్ముజ్ జలసంధి గుండా ప్రయాణించడానికి ప్రయత్నించిన నౌకల భద్రతపై స్పష్టతనిచ్చింది. ఈ మార్గంలో ప్రయాణించిన మొత్తం నౌకల్లో సుమారు 97 శాతం నౌకలు ఇరాన్ క్షిపణులు లేదా ఇతర దాడులకు ఎలాంటి గురికాకుండా పూర్తిగా సురక్షితంగా తమ గమ్యస్థానాలకు చేరాయని అమెరికా సైన్యం వెల్లడించింది. కొన్ని ప్రాంతాల్లో వాణిజ్య నౌకలపై దాడులు జరుగుతున్న మాట వాస్తవమే అయినప్పటికీ ప్రపంచ ఆర్థిక వ్యవస్థను నడిపించే ఈ వ్యూహాత్మక నౌకా రవాణా మార్గం ఇప్పటికీ తెరిచే ఉందని, నౌకల రాకపోకలు కొనసాగుతున్నాయని స్పష్టం చేసింది.
