
Farooq Abdullah :జమ్మూకశ్మీర్లో మరోసారి రాజకీయ వివాదం మొదలైంది. మాజీ సీఎం, నేషనల్ కాన్ఫరెన్స్ అధినేత ఫరూక్ అబ్దుల్లా చేసిన వ్యాఖ్యలపై బీజేపీ తీవ్రంగా మండిపడింది. కశ్మీరీల విషయంలో భారత ప్రభుత్వ ఉద్దేశాలు సరిగ్గా లేవని ఆయన చేసిన వ్యాఖ్యలను బీజేపీ పాకిస్థాన్ అనుకూల వ్యాఖ్యలు,దేశద్రోహపూరిత వ్యాఖ్యలు అంటూ విమర్శించింది. ఫరూక్ అబ్దుల్లా మాట్లాడుతూ.. కశ్మీరీల విషయంలో భారత ప్రభుత్వ ఆలోచనలు, ఉద్దేశాలు సరిగ్గా లేవని అన్నారు. అలాగే పాకిస్థాన్ చేస్తున్న దౌత్య ప్రయత్నాల వల్లే కశ్మీరీల గొంతు ప్రపంచ స్థాయిలో వినిపిస్తోందని ఆయన వ్యాఖ్యానించారు. ఈ వ్యాఖ్యలే ఇప్పుడు బీజేపీ, నేషనల్ కాన్ఫరెన్స్ మధ్య మాటల యుద్ధానికి కారణమయ్యాయి.
ఫరూక్ అబ్దుల్లా వ్యాఖ్యలపై బీజేపీ జాతీయ అధికార ప్రతినిధి ఆర్పీ సింగ్ తీవ్రంగా స్పందించారు. అబ్దుల్లా ఒక్కసారి సరిహద్దు అవతల ఉన్న కశ్మీర్ పరిస్థితిని కూడా చూడాలని అన్నారు. అక్కడి కశ్మీరీలు ఎలా జీవిస్తున్నారో గమనించాలని సూచించారు. ఆర్టికల్ 370 రద్దు చేసి జమ్మూకశ్మీర్ను పూర్తిగా భారత్లో కలిపిన తర్వాత పరిస్థితులు మెరుగయ్యాయని ఆర్పీ సింగ్ చెప్పారు. అందుకే ప్రతి ఏడాది దాదాపు రెండు కోట్ల మంది పర్యాటకులు కశ్మీర్కు వస్తున్నారని అన్నారు. పర్యాటక రంగం పెరగడంతో పాటు కశ్మీర్ ఆర్థికంగా కూడా ముందుకు వెళ్తోందని పేర్కొన్నారు.
బీజేపీ జాతీయ కౌన్సిల్ సభ్యురాలు యామినీ శర్మ కూడా ఫరూక్ అబ్దుల్లా వ్యాఖ్యలపై తీవ్రంగా స్పందించారు. ఆయన మాటలు భారత రాజ్యాంగాన్ని, దేశభక్తి ఉన్న జమ్మూకశ్మీర్ ప్రజలను అవమానించేలా ఉన్నాయని అన్నారు. సరిహద్దు దాటి వచ్చే ఉగ్రవాదం కారణంగా కశ్మీర్లో వేలాది మంది ప్రాణాలు కోల్పోయారని యామినీ శర్మ గుర్తు చేశారు. ఇలాంటి పరిస్థితుల్లో పాకిస్థాన్ వాదనను ఫరూక్ అబ్దుల్లా వినిపిస్తున్నారని ఆమె ఆరోపించారు. నేషనల్ కాన్ఫరెన్స్ పాకిస్థాన్కు వాయిస్గా మారిపోయిందని విమర్శించారు.
బీజేపీ ఎమ్మెల్యే యుధ్వీర్ సేథీ కూడా ఫరూక్ అబ్దుల్లా వ్యాఖ్యలను ఖండించారు. ఆయన చేసిన వ్యాఖ్యలు భారత్కు వ్యతిరేకంగా, పాకిస్థాన్కు అనుకూలంగా ఉన్నాయని ఆరోపించారు. దేశానికి వ్యతిరేకంగా మాట్లాడేవారిపై దేశద్రోహం కేసు పెట్టాలని ఆయన అన్నారు. జమ్మూకశ్మీర్లో ఉగ్రవాదం, హింస వెనుక పాకిస్థాన్ ఉందనే విషయం ప్రపంచానికి తెలుసని యుధ్వీర్ సేథీ అన్నారు. అలాంటి దేశానికి అనుకూలంగా మాట్లాడటం ఖండించాల్సిన విషయమని చెప్పారు. ఫరూక్ అబ్దుల్లా తన వ్యాఖ్యలకు క్షమాపణ చెప్పాలని డిమాండ్ చేశారు.









