Sai Pallavi :  రామాయణ సినిమాలో సీత పాత్రలో నటిస్తున్న సాయి పల్లవి వివాదంలో చిక్కుకుంది. రావణుడిపై ఆమె చేసిన వ్యాఖ్యలు ఇప్పుడు సోషల్‌ మీడియాలో వైరల్‌గా మారాయి. రావణుడు పూర్తిగా చెడ్డవాడు కాదు అంటూ ఆమె చేసిన వ్యాఖ్యలపై కొందరు నెటిజన్లు అభ్యంతరం వ్యక్తం చేస్తుండగా.. మరికొందరు మాత్రం ఆమె మాటలను తప్పుగా అర్థం చేసుకుంటున్నారని సాయి పల్లవికి మద్దతుగా నిలుస్తున్నారు.

నితేశ్‌ తివారీ దర్శకత్వంలో రణ్‌బీర్‌ కపూర్‌, సాయి పల్లవి, యశ్‌ ప్రధాన పాత్రల్లో ‘రామాయణ’ సినిమా తెరకెక్కుతోంది. ఈ సినిమా నవంబర్‌ 5, 2026న ప్రేక్షకుల ముందుకు రానుంది. విడుదలకు ముందు అక్టోబర్‌ 27న అమెరికాలోని లాస్‌ ఏంజెల్స్‌లో సినిమా ప్రీమియర్‌ నిర్వహించారు.

Also Read : ఆదర్శ కుటుంబం.. ఏపీ సర్కార్ గుడ్ న్యూస్!

ఈ సందర్భంగా రెడ్‌ కార్పెట్‌పై సాయి పల్లవి మాట్లాడారు. రామాయణ సినిమా ద్వారా భారతీయ సంస్కృతి, మన ఇతిహాసాల గురించి ప్రపంచ ప్రేక్షకులకు పరిచయం చేయాలనే ఉద్దేశంతో ఈ సినిమా రూపొందుతోందని చెప్పారు. అయితే రావణుడి గురించి ఆమె చేసిన వ్యాఖ్యలు మాత్రం అందరి దృష్టిని ఆకర్షించాయి. ‘‘రామాయణాన్ని ఒక గ్రంథంగా చూస్తే.. మనలో ఉన్న మంచి, చెడును మనమే పరిశీలించుకోవాలి. మనలో ఏది తప్పో గుర్తించి, కాలంతో పాటు దాన్ని మార్చుకోవాలి. ఎందుకంటే రావణుడు పూర్తిగా చెడ్డవాడు కాదు. మనలో ఉన్న రావణుడిని గుర్తించి, మనలో మార్పు తెచ్చుకోవడం ముఖ్యం’’ అని సాయి పల్లవి అన్నారు.

ఈ వ్యాఖ్యల వీడియో సోషల్‌ మీడియాలో వైరల్‌ కావడంతో నెటిజన్ల నుంచి భిన్నమైన స్పందనలు వస్తున్నాయి. కొందరు సాయి పల్లవి మాటలను తప్పుబడుతున్నారు. ఇలాంటి వ్యాఖ్యలు చేయడం వల్ల అనవసరమైన వివాదం పెరుగుతుందని అభిప్రాయపడుతున్నారు.

మరోవైపు కొందరు ఆమెను సమర్థిస్తున్నారు. రావణుడిలో ఉన్న మంచి లక్షణాల గురించి కాకుండా.. ప్రతి మనిషిలోనూ ఉండే చెడు లక్షణాలను రావణుడుతో పోల్చి, వాటిని జయించాలని సాయి పల్లవి చెప్పారని వివరిస్తున్నారు. ఆమె వ్యాఖ్యలను పూర్తిగా వినకుండా, కొంత భాగాన్ని మాత్రమే తీసుకుని వివాదం చేస్తున్నారని అంటున్నారు.

మరికొందరు మాత్రం సాయి పల్లవిపై ఇప్పటికే సోషల్‌ మీడియాలో విమర్శలు వస్తున్నాయని, ఇలాంటి వ్యాఖ్యలు మరింత ఇబ్బందులు తెచ్చిపెట్టే అవకాశం ఉందని ఆందోళన వ్యక్తం చేస్తున్నారు. కాగా రామాయణ సినిమాను రెండు భాగాలుగా ప్రేక్షకుల ముందుకు తీసుకురానున్నారు. తొలి భాగం నవంబర్‌ 5, 2026న ప్రపంచవ్యాప్తంగా విడుదల కానుంది. రెండో భాగాన్ని 2027 దీపావళికి విడుదల చేయనున్నారు.

Also Read : నా గురించి ఆలోచించకండి.. ట్రోలింగ్‌పై రష్మిక రియాక్షన్

Vamshi Krishna
కందారపు వంశీకృష్ణ ఏడేళ్లుగా జర్నలిజంలో ఉన్నారు. డిజిటల్ మీడియాలో ముందుగా HMTVలో రెండేళ్లు పనిచేశారు. అనంతరం TV5లో ఏడాది, V6లో రెండున్నరేళ్లు పనిచేశారు. తర్వాత పల్లవి టీవీలో చేరి అక్కడ 6 నెలలు పనిచేశారు. ప్రస్తుతం ఆర్టీవీలో ఏడాదిన్నరగా పనిచేస్తున్నారు. బ్రేకింగ్స్, పొలిటికల్, నేషనల్, స్పోర్ట్స్, సినిమా తదితర కేటగిరీల వార్తలు ఎక్కువగా రాస్తుంటారు.