PoK protests : పాకిస్థాన్ ఆక్రమిత కశ్మీర్ (PoK)లో పరిస్థితులు అత్యంత ఉద్రిక్తంగా మారాయి. ఇస్లామాబాద్ ప్రభుత్వ నిరంకుశ చర్యలకు, ఆర్థిక అణచివేతకు వ్యతిరేకంగా వేలాది మంది ప్రజలు వీధుల్లోకి రావడంతో పీవోకే రణరంగంగా మారింది. నిరసనకారులను అణచివేయడానికి పాక్ భద్రతా బలగాలు, రేంజర్లు జరిపిన అనాగరిక కాల్పుల్లో ఒకరు అక్కడికక్కడే ప్రాణాలు కోల్పోగా, మరో 14 మందికి పైగా తీవ్రంగా గాయపడ్డారు. ఈ దారుణ ఘటనతో ముజఫరాబాద్, మీర్పూర్ ప్రాంతాల్లో మరోసారి తీవ్ర ఉద్రిక్త వాతావరణం నెలకొంది.
ప్రభుత్వ అణచివేత వైఖరికి నిరసనగా ఆదివారం పీవోకే వ్యాప్తంగా భారీ ర్యాలీలు నిర్వహించారు. ముఖ్యంగా దద్యాల్-మీర్పూర్ వంతెనపైకి నిరసనకారులు భారీ సంఖ్యలో చేరుకోవడంతో రంగంలోకి దిగిన పాక్ రేంజర్లు ఏకే-47 తుపాకులతో విచక్షణారహితంగా కాల్పులు జరిపినట్లు అంతర్జాతీయ మీడియా వర్గాలు ధృవీకరించాయి. ముజఫరాబాద్లోనూ ఆందోళనకారులపై బలగాలు విరుచుకుపడ్డాయి. జనాన్ని చెదరగొట్టడానికి పోలీసులు టియర్ గ్యాస్, షెల్స్ ప్రయోగించడంతో పల్లెలు, పట్టణాలు యుద్ధభూమిని తలపించాయి. ఈ ఘోరానికి సంబంధించిన వీడియోలు ప్రస్తుతం సోషల్ మీడియాలో వైరల్ అవుతున్నాయి.
గత కొన్ని రోజులుగా పీవోకేలో పెరుగుతున్న ద్రవ్యోల్బణం, విద్యుత్ సంక్షోభంపై ప్రజలు శాంతియుతంగా పోరాడుతున్నారు. ఈ ప్రజా నిరసనలకు నాయకత్వం వహిస్తున్న ‘జాయింట్ అవామీ యాక్షన్ కమిటీ’ (JAAC)ని అణచివేయడానికి పాక్ ప్రభుత్వం కుట్ర పన్నింది. ఈ సంస్థను ఏకంగా ఉగ్రవాద వ్యతిరేక చట్టం కింద నిషేధించి, దానికి చెందిన 600 మందికి పైగా కీలక నాయకులను, సామాన్య కార్యకర్తలను భద్రతా బలగాలు అక్రమంగా నిర్బంధించాయి. ఈ అక్రమ అరెస్టులే ప్రస్తుత హింసాత్మక పరిణామాలకు ప్రధాన కారణమయ్యాయి.
Also Read : ఖమేనీ అంత్యక్రియలు.. పక్కనే 14నెలల మనుమరాలి శవపేటిక.. శోకసముద్రమైన ఇరాన్
నిరసనకారులను లొంగతీసుకోవడానికి పాకిస్థాన్ ప్రభుత్వం అత్యంత అమానవీయమైన మార్గాలను ఎంచుకుంది. పీవోకే ప్రాంతంలోకి వెళ్లే నిత్యావసర సరుకులు, ఆహార పదార్థాలు, పిల్లల పాలు మరియు అత్యవసర మందుల సరఫరాను సరిహద్దుల వద్దే నిలిపివేసింది. లడఖ్, కశ్మీర్ సరిహద్దుల్లోని ఈ ప్రాంత ప్రజలను ఆకలితో అలమటించేలా చేసి, ఉద్యమాన్ని నీరుగార్చాలని ఇస్లామాబాద్ చూస్తోంది. ప్రభుత్వ అధికారిక దిగ్బంధనంపై స్థానిక ప్రజలు తీవ్ర ఆగ్రహం వ్యక్తం చేస్తున్నారు.
ప్రభుత్వ బెదిరింపులకు వెనక్కి తగ్గని నిరసనకారులు, జేఏఏసీ పిలుపు మేరకు మరింత ఉధృతంగా రోడ్లపైకి వస్తున్నారు. తమ ప్రాంతంలో నిలిపివేసిన ఇంటర్నెట్, కమ్యూనికేషన్ సమాచార వ్యవస్థను వెంటనే పునరుద్ధరించాలని వారు డిమాండ్ చేస్తున్నారు. అలాగే ఆహారం, మందుల సరఫరాను అడ్డుకోవద్దని, నిర్బంధంలో ఉన్న 600 మంది నేతలను బేషరతుగా విడుదల చేయాలని, గతంలో కుదిరిన ’38 పాయింట్ల ఒప్పందాన్ని’ తక్షణమే అమలు చేయాలని స్పష్టం చేస్తున్నారు.
ఈ నిరసనల్లో భాగంగా పాక్ బలగాల కాల్పుల్లో మరణించిన వారి మృతదేహాలను కూడా ప్రభుత్వం కుటుంబ సభ్యులకు అప్పగించకపోవడం అక్కడి అరాచక పాలనకు అద్దం పడుతోంది. చనిపోయిన తమ వారి శవాలను గౌరవప్రదంగా అంత్యక్రియలు నిర్వహించుకోవడానికి కనీసం కుటుంబాలకు అప్పగించాలంటూ బాధితులు రోదిస్తున్నారు. ప్రజాస్వామ్య హక్కులను పూర్తిగా కాలరాస్తూ, స్వంత పౌరులపైనే సైన్యాన్ని ప్రయోగిస్తున్న పాకిస్థాన్ తీరుపై అంతర్జాతీయ మానవ హక్కుల సంఘాలు మండిపడుతున్నాయి.
Also Read : ఖమేనీ అంత్యక్రియలు.. భారత్, చైనా, పాక్తో పాటు హాజరు కానున్న వారు ఎవరంటే?
