Dehradun : డెహ్రాడూన్‌లో ఓ వింత దొంగతనం ఘటన వెలుగులోకి వచ్చింది. ఓ ఇంట్లో ఐఫోన్ దొంగిలించిన వ్యక్తి.. ఆ ఫోన్‌ను అన్‌లాక్ చేయలేక చివరకు యజమాని కుటుంబానికే మెసేజ్ చేశాడు. ఫోన్ పాస్‌కోడ్ చెప్పాలని అడిగాడు. ఈ మెసేజ్‌ల స్క్రీన్‌షాట్‌లను బాధితురాలి సోదరి పోలీసులకు అందించారు. నిందితుడి వివరాలు తెలిసినప్పటికీ పోలీసులు వెంటనే ఎందుకు చర్యలు తీసుకోలేదని ఆమె ప్రశ్నించారు.
సన్‌షైన్ ఎన్‌క్లేవ్‌కు చెందిన కౌశికీ ధ్యాని ఈ ఘటన గురించి ఇన్‌స్టాగ్రామ్‌లో ఓ వీడియో ద్వారా వెల్లడించారు. సెప్టెంబర్ 12న క్లెమెంట్ టౌన్ ప్రాంతంలో తన సోదరుడితో పాటు మరికొందరి ఫోన్లు దొంగిలించారని ఆమె చెప్పారు. అదే ప్రాంతంలో ల్యాప్‌టాప్‌లు, మ్యాక్‌బుక్‌లు, మొబైల్ ఫోన్లు, ఇతర విలువైన వస్తువులు కలిపి లక్షల రూపాయల విలువైన సామాను చోరీకి గురైందని తెలిపారు. అయితే కొందరు బాధితుల ఫిర్యాదులను పోలీసులు పట్టించుకోలేదని, కొన్ని సందర్భాల్లో ఫిర్యాదులు కూడా తీసుకోలేదని ఆమె ఆరోపించారు.
అయితే ఐఫోన్ దొంగతనం తర్వాత ఈ వ్యవహారం ఊహించని మలుపు తిరిగింది. తనకు వరుసగా మెసేజ్‌లు రావడం మొదలైందని కౌశికీ తెలిపారు. తన ఐఫోన్ ఉన్న వ్యక్తే ఆ మెసేజ్‌లు పంపినట్లు ఆమె చెప్పారు. ఫోన్‌ను అన్‌లాక్ చేయలేకపోవడంతో పాస్‌కోడ్ చెప్పాలని అతడు పదేపదే అడిగినట్లు తెలిపారు. రాత్రి సుమారు 10 గంటల సమయంలో ఈ మెసేజ్‌లు రావడంతో తాను పోలీస్ స్టేషన్‌కు వెళ్లినట్లు కౌశికీ చెప్పారు. అయితే మరుసటి రోజు ఉదయం రావాలని పోలీసులు తనకు చెప్పారని ఆమె ఆరోపించారు. తర్వాత ఆ మెసేజ్‌ల స్క్రీన్‌షాట్‌లతో పాటు సీసీటీవీ ఫుటేజీ, అనుమానితుడి ఫొటోను కూడా కౌశికీ సోషల్ మీడియాలో షేర్ చేశారు. ఇన్ని ఆధారాలు ఉన్నా వెంటనే ఎందుకు చర్యలు తీసుకోలేదని ఆమె పోలీసులను ప్రశ్నించారు.
సెప్టెంబర్ 12న జరిగిన దొంగతనం ఒక్కటే ఘటన కాదని కూడా కౌశికీ ఆరోపించారు. ఆ ప్రాంతంలో పలువురు ఇళ్ల నుంచి ల్యాప్‌టాప్‌లు, మ్యాక్‌బుక్‌లు, మొబైల్ ఫోన్లు, ఇతర ఖరీదైన వస్తువులు చోరీకి గురయ్యాయని చెప్పారు. దగ్గరలోని పేయింగ్ గెస్ట్ వసతులు, హాస్టళ్లను కూడా దొంగలు టార్గెట్ చేసినట్లు ఆమె తెలిపారు. డీఐటీ యూనివర్సిటీ, గ్రాఫిక్ ఎరా యూనివర్సిటీ సమీపంలోని ప్రాంతాల్లో ఉన్న సీసీటీవీ కెమెరాల ఫుటేజీలో కూడా ఇదే వ్యక్తిలా కనిపించే ఓ అనుమానితుడు కనిపించాడని కౌశికీ చెప్పారు. వేర్వేరు దొంగతనం కేసులకు సంబంధించిన సీసీటీవీ ఫుటేజీలను పోలీసులు పరిశీలించి, ఈ ఘటనలన్నింటికీ సంబంధం ఉందో లేదో తెలుసుకోవాలని ఆమె కోరారు.
తన ఐఫోన్‌లో ఒక కాంటాక్ట్ నంబర్ కనిపిస్తూ ఉండటంతో ఫోన్ తీసుకున్న వ్యక్తి తనను సంప్రదించగలిగాడని కౌశికీ తెలిపారు. ఆ తర్వాత తనకు SMS, వాట్సాప్ మెసేజ్‌లు కూడా వచ్చాయని చెప్పారు. ఐఫోన్ పాస్‌వర్డ్ చెప్పాలని వాటిలో అడిగినట్లు తెలిపారు. దొంగలకు ఇప్పుడు పోలీసులంటే భయం కూడా లేకుండా పోయిందని కౌశికీ ఆరోపించారు. ఉత్తరాఖండ్ పోలీసులు తమను పట్టుకోలేరని, తమపై చర్యలు తీసుకోలేరని దొంగలు భావిస్తున్నారని ఆమె ఆరోపించారు.
