Jantar Mantar : ఢిల్లీలో నిరసనలు, ధర్నాలు చేసేందుకు మూడు కొత్త చోట్లను ఎంపిక చేశారు. కేంద్ర హోం శాఖ కింద పనిచేసే కమిటీ సూచనల మేరకు ఈ నిర్ణయం తీసుకున్నారు. ఇప్పటివరకు నిరసనలు జరిగే జంతర్ మంతర్‌లో ఇకపై ఆందోళనలు చేసేందుకు అనుమతి ఉండదు. కొత్తగా ఎంపిక చేసిన చోట్లలో రాంలీలా మైదాన్, బురారీ మైదాన్, తూర్పు ఢిల్లీలోని సీబీడీ గ్రౌండ్ ఉన్నాయి. ఇకపై నిరసనలు చేయాలనుకునే వారు ఈ మూడు చోట్లలోనే ఆందోళనలు నిర్వహించాల్సి ఉంటుంది.
ప్రత్యేక ఓటర్ల జాబితా సవరణ వివాదంపై ప్రస్తుతం ఢిల్లీలో నిరసనలు జరుగుతున్నాయి. ప్రధాన ఎన్నికల కమిషనర్ జ్ఞానేశ్ కుమార్‌కు వ్యతిరేకంగా ప్రతిపక్ష కూటమి ‘ఇండియా’, వ్యంగ్య రాజకీయ బృందం ‘కాక్‌రాచ్ జనతా పార్టీ’ (సీజేపీ) ఆందోళనలు చేస్తున్నాయి. ఇలాంటి సమయంలో నిరసనల వేదికలను మార్చడం చర్చకు దారితీసింది.
Also Read : ఇది శివుడి తాండవం.. ప్లాన్ అవసరం లేదు .. రాహుల్ గాంధీ సంచలన వ్యాఖ్యలు!
ఈ నిర్ణయంపై ప్రతిపక్షాలు కేంద్ర ప్రభుత్వాన్ని విమర్శించే అవకాశం ఉంది. నిరసనలు చేయకుండా అడ్డుకోవడానికే కేంద్రం ఈ నిర్ణయం తీసుకుందని ప్రతిపక్షాలు ఆరోపించవచ్చు. ఢిల్లీ పోలీసులు కేంద్ర హోం శాఖ పరిధిలోనే పనిచేస్తారు.
అయితే, జంతర్ మంతర్ దగ్గర ట్రాఫిక్ ఇబ్బందులు తగ్గే అవకాశం ఉంది. ఈ ప్రాంతం ప్రభుత్వానికి సంబంధించిన ముఖ్యమైన కార్యాలయాలకు దగ్గరగా ఉంటుంది. అక్కడ నిరసనలు జరిగినప్పుడు వాహనాల రాకపోకలకు ఇబ్బందులు ఎదురవుతుంటాయి. నిరసనలను వేరే చోట్లకు మార్చడంతో ప్రజలకు ట్రాఫిక్ సమస్యలు తగ్గవచ్చని భావిస్తున్నారు.
జంతర్ మంతర్‌ను నిరసనలు చేసేందుకు అనుమతి ఉన్న ప్రాంతాల జాబితా నుంచి తొలగిస్తూ ఢిల్లీ పోలీస్ కమిషనర్ అనురాగ్ కుమార్ ఉత్తర్వులు జారీ చేశారు. కొత్తగా ఎంపిక చేసిన మూడు చోట్లను నిరసనల వేదికలుగా గుర్తించినట్లు ఉత్తర్వుల్లో పేర్కొన్నారు. ఈ మూడు చోట్ల నిరసనలు, ధర్నాలు నిర్వహించాలంటే ఎలాంటి నిబంధనలు పాటించాలో పోలీసులు త్వరలో ప్రకటించనున్నారు.
Also Read : మార్కెట్‌లోకి కొత్త సరుకు.. 200MP కెమెరాతో మొబైల్ ఫీచర్లు హైలైట్..!
