Pune Realtor Murder :  దేశవ్యాప్తంగా తీవ్ర సంచలనం సృష్టించిన పుణె యువ వ్యాపారవేత్త, రియల్టర్ కేతన్ అగర్వాల్ హత్య కేసు (Pune Realtor Murder Case) దర్యాప్తులో రోజుకో కొత్త విషయం వెలుగుచూస్తోంది. ఈ ఘోర హత్య వెనుక ఉన్న చీకటి కోణాలను, నిందితుల పక్కా ప్లాన్‌ను పోలీసులు ఒక్కొక్కటిగా ఛేదిస్తున్నారు. కేతన్ కాబోయే భార్య సియా గోయల్, ఆమె ప్రియుడు చేతన్ కలిసి అత్యంత క్రూరంగా, పక్కా స్కెచ్‌తో ఈ హత్యకు ఒడిగట్టినట్లు పోలీసుల విచారణలో స్పష్టమైంది.

లోహ్‌గఢ్ కోటపై కేతన్‌ను హతమార్చడానికి నిందితులు వేసుకున్న వ్యూహం పోలీసులను సైతం విస్మయానికి గురిచేస్తోంది. కోటపై కేతన్ కొండ అంచున నిలబడి ఉన్న సమయంలో, అతనికి ఎలాంటి అనుమానం రాకుండా సియా ఒక రహస్య సంకేతాన్ని (సిగ్నల్) ఉపయోగించింది. తన షూ లేస్ కట్టుకోవడానికో లేదా నీళ్లు తాగడానికో అన్నట్లుగా ఆమె అకస్మాత్తుగా నేలపై కూర్చుంది. ఇదే తరుణం కోసం పొంచి ఉన్న ఆమె ప్రియుడు చేతన్‌కు అది ఒక సంకేతంగా మారింది. కేతన్ ప్రమాదవశాత్తూ పడిపోతున్నట్లు సృష్టించడం, ఒకవేళ అతను తనను పట్టుకోవడానికి ప్రయత్నించినా అందకుండా ఉండేందుకే సియా అలా కింద కూర్చున్నట్లు పోలీసులు గుర్తించారు.

ఈ ఘాతుకానికి పాల్పడేందుకు నిందితుడు చేతన్ అత్యంత తెలివిగా వ్యవహరించాడు. పుణె నుంచి దాదాపు 90 కిలోమీటర్ల దూరంలో ఉన్న లోహ్‌గఢ్ కోటకు అతను కారులో వెళ్తే టోల్ ప్లాజాల వద్ద ఉండే సీసీటీవీ కెమెరాల్లో రికార్డ్ అవుతుందని భావించాడు. అందుకే పోలీసుల కళ్లు కప్పడానికి అతను అంత దూరం స్కూటర్‌పైనే ప్రయాణించి వచ్చాడు. హత్య అనంతరం అదే స్కూటర్‌పై గుట్టుచప్పుడు కాకుండా పుణెకు తిరిగొచ్చి, సాక్ష్యాలను నాశనం చేసేందుకు వెంటనే తన దుస్తులను కూడా మార్చుకున్నట్లు దర్యాప్తులో తేలింది.

Also Read : ముంబైని ముంచెత్తిన అర్ధరాత్రి వర్షాలు: వాతావరణ శాఖ ఎల్లో అలర్ట్!

Pune Realtor Murder Twist

హత్య జరగడానికి కేవలం అరగంట ముందు సియా, చేతన్‌ల మధ్య జరిగిన ఒక రహస్య ఫోన్ కాల్ (Secret Phone Call) ఇప్పుడు ఈ కేసులో అత్యంత కీలకమైన డిజిటల్ సాక్ష్యంగా మారింది. కోటలోని పర్యాటకులు ఎవరూ లేని ఒక నిర్మానుష్య వ్యూపాయింట్‌కు కేతన్‌ను తీసుకురావాలని ఆ కాల్‌లో వారు మాట్లాడుకున్నారు. అక్కడ ఎవరూ లేరని నిర్ధారించుకున్న తర్వాతే సియా తనకు సిగ్నల్ ఇవ్వాలని చేతన్ సూచించాడు. ఈ ఘోరానికి మూడు నెలల ముందు నుంచే వారిద్దరూ తమ మధ్య జరిగిన కాల్స్, చాట్స్, వాయిస్ నోట్స్ అన్నింటినీ డిలీట్ చేస్తూ పోలీసులకు దొరకకుండా జాగ్రత్త పడ్డారు.

ఈ దారుణ హత్యకు కొన్ని రోజుల ముందే కేతన్ విదేశీ పర్యటనను అడ్డుకోవడానికి ఒక పెద్ద కుట్ర జరిగింది. జూన్ 6న ప్రీ-వెడ్డింగ్ షూటింగ్ కోసం కేతన్, సియా కలిసి బాలి వెళ్లాల్సి ఉంది. అయితే, చివరి నిమిషంలో కేతన్ పాస్‌పోర్ట్ హఠాత్తుగా మాయం కావడంతో ఆ పర్యటన రద్దయింది. ఈ పాస్‌పోర్ట్ అదృశ్యం వెనుక పెద్ద నాటకమే నడిచిందని, కేతన్‌ను బాలి వెళ్లకుండా అడ్డుకుని ఇక్కడే హతమార్చాలనే కుట్రలో భాగమే ఇదంతా అని పోలీసులు అనుమానిస్తున్నారు.

ఈ పాస్‌పోర్ట్ మిస్సింగ్ ఉదంతంపై కేతన్, సియా ప్రయాణించిన క్యాబ్ డ్రైవర్ ఇచ్చిన స్టేట్‌మెంట్ ఇప్పుడు కేసును మరో మలుపు తిప్పింది. ముంబయి ఎయిర్‌పోర్టుకు వెళ్లే క్రమంలో సియా సోదరుడు సాహిల్ ఆమెను బలవంతంగా కారులో కూర్చోబెట్టాడని డ్రైవర్ తెలిపాడు. మార్గమధ్యంలో టీ తాగడానికి కారు ఆపినప్పుడు, సియా కారు డిక్కీ (బూట్) ఓపెన్ చేయమని అడిగిందని, ఆ సమయంలో ఆమె తన పర్సులోంచి ఏదో ఒక వస్తువును తీయడం తాను గమనించానని డ్రైవర్ పోలీసులకు వివరించాడు.

ఆ తర్వాత వారు ఎయిర్‌పోర్టులో దిగిపోయిన రెండు నిమిషాలకే కారులో ఒక చిన్న బ్యాగ్ మరిచిపోయామంటూ డ్రైవర్‌కు ఫోన్ వచ్చింది. డ్రైవర్ వెనక్కి వెళ్లి ఆ బ్యాగ్ అప్పగించిన కాసేపటికే.. కేతన్ పాస్‌పోర్ట్ కనిపించడం లేదంటూ మళ్లీ ఫోన్ చేశారు. కారులోనే పడిపోయిందేమోనని వారు డ్రైవర్‌తో వీడియో కాల్‌లో కూడా చెక్ చేయించారు. అయినా దొరకకపోవడంతో సియా సోదరుడు సాహిల్, కేతన్ వచ్చి కారును స్వయంగా వెతికినా ఫలితం లేకపోవడంతో వారు విమానాశ్రయం నుంచి వెనుదిరగాల్సి వచ్చింది.

ఈ పాస్‌పోర్ట్ మాయం కావడంపై కేతన్ తండ్రి విశాల్ అగర్వాల్ కూడా తీవ్ర అనుమానాలు వ్యక్తం చేశారు. ఎయిర్‌పోర్టుకు బయలుదేరే ముందు కారు ఎక్కేటప్పుడు అందరూ తమ పాస్‌పోర్టులు, పత్రాలను సరిచూసుకుని ఒకే పర్సులో భద్రపరిచారని ఆయన తెలిపారు. అంత జాగ్రత్తగా ఉన్నా, కేవలం కేతన్ పాస్‌పోర్ట్ మాత్రమే ఎలా మాయమైందో అర్థం కాలేదని, దీని వెనుక ఖచ్చితంగా సియా హస్తం ఉండి ఉంటుందని ఆయన ఆరోపించారు.

హత్య జరిగిన రోజు సియా ప్రవర్తన కొందరు మహిళా పోలీసుల మాటలతో ఒక్కసారిగా మారిపోయింది. జూన్ 18న ఉదయం 10:30 గంటల ప్రాంతంలో కేతన్ కొండపై నుంచి కిందపడగా, మధ్యాహ్నం సహాయక బృందాలు మృతదేహాన్ని వెలికితీశాయి. ఆ సమయంలో అక్కడున్న ఒక మహిళా పోలీస్ అధికారిణి.. కేతన్‌లో ఇంకా ప్రాణం ఉన్నట్లుంది, త్వరగా ఆసుపత్రికి తరలించాలని అనగానే సియా ముఖంలో రంగులు మారిపోయాయి. ఒకవేళ కేతన్ బతికితే తన గుట్టు రట్టవుతుందనే భయం ఆమె ముఖంలో స్పష్టంగా కనిపించిందని కేతన్ తండ్రి పేర్కొన్నారు.

ఘటన జరిగిన తర్వాత ఇంటికి వచ్చిన సియా ప్రవర్తన నాటకీయంగా ఉండటంతో కేతన్ సోదరికి మొదటి అనుమానం వచ్చింది. అసలు కోటపై ఏం జరిగింది? కేతన్ ఏ కాలు జారి పడిపోయాడు? నువ్వు ఎక్కడ కూర్చున్నావు? అని గుచ్చిగుచ్చి ప్రశ్నించగా సియా నోరు మెదపలేదు. పైగా ఆమె ఏడుపు చాలా కృత్రిమంగా, నటనలాగా అనిపించింది. మరుసటి రోజు కూడా కుటుంబ సభ్యులు ఇదే విషయమై నిలదీయగా ఆమె మౌనంగానే ఉండిపోయింది. అంతలోనే పెళ్లి సంబంధం కుదిర్చిన ఆమె అత్త వచ్చి సియాను అక్కడి నుంచి తీసుకెళ్లిపోవడం అనుమానాలను మరింత బలపరిచింది.

కూతురి లాంటి కోడలి ప్రవర్తనపై పూర్తిగా అనుమానం వచ్చిన విశాల్ అగర్వాల్ కుటుంబం.. ఘటనా స్థలానికి సంబంధించిన సీసీటీవీ దృశ్యాలను క్షుణ్ణంగా పరిశీలించింది. కాబోయే భర్త అంత దారుణంగా కళ్ల ముందే పడిపోతే, కనీసం కన్నీరు కూడా పెట్టుకోకుండా సియా చాలా సాధారణంగా నడుచుకుంటూ రావడం ఆ వీడియోల్లో స్పష్టమైంది. దీంతో ఆమెపై నమ్మకం కోల్పోయిన కుటుంబ సభ్యులు పోలీసులకు ఫిర్యాదు చేయడంతో అసలు నిజా నిజాలు బయటపడ్డాయి.

ఇటీవల పోలీసులు సియా సోదరుడు సాహిల్‌ను అదుపులోకి తీసుకుని విచారించగా, హంతకుడు చేతన్‌తో సియాకు గత కొన్ని ఏళ్లుగా అత్యంత సన్నిహిత సంబంధం ఉన్నట్లు ఒప్పుకున్నాడు. స్థానిక క్రికెట్ మ్యాచ్‌ల సమయంలో వీరిద్దరికీ పరిచయం ఏర్పడిందని సాహిల్ వెల్లడించాడు. నిశ్చితార్థానికి ముందు కూడా సియా తన స్నేహితులతో కలిసి ఉదయ్‌పుర్ ట్రిప్‌కు వెళ్లగా, అందులో చేతన్ కూడా ఉన్నట్లు తెలిసింది. ప్రస్తుతం ప్రధాన నిందితుడు చేతన్‌ను అరెస్ట్ చేసిన పోలీసులు, హత్యకు ఉపయోగించిన స్కూటర్, హుడీ, హెడ్‌ఫోన్స్‌ను స్వాధీనం చేసుకుని తదుపరి దర్యాప్తును ముమ్మరం చేశారు.

Also Read : పెళ్లికి ఒప్పుకోలేదని ప్రియుడి ఆగ్రహం.. కారులో బాంబు పేల్చి…