CM Revanth Reddy : రాష్ట్రంలో ప్రస్తుతం జరుగుతున్న ఓటర్ల జాబితా ప్రత్యేక సమగ్ర సవరణ (SIR) ప్రక్రియ పట్ల అధికార యంత్రాంగం, కాంగ్రెస్ శ్రేణులు అత్యంత ప్రాధాన్యతతో వ్యవహరించాలని సీఎం ఆదేశించారు. ఓటర్ల జాబితా ప్రక్షాళన పేరుతో కాంగ్రెస్ పార్టీకి సాంప్రదాయకంగా మద్దతుగా నిలిచే ఎస్సీ, ఎస్టీ, బిసి, మైనారిటీ, తండావాసుల ఓట్లను కుట్రపూరితంగా తొలగించే అవకాశం ఉందనే అనుమానాన్ని వ్యక్తం చేశారు. ఓటు హక్కు కోల్పోతే ఆధార్ కార్డుల రద్దుతో పాటు ప్రభుత్వ సంక్షేమ పథకాలు నిలిచిపోయే ప్రమాదం ఉందని, కావున బూత్ లెవల్ ఏజెంట్లు (BLA) ప్రతి ఇంటీకీ వెళ్లేలా మంత్రులు, ఎమ్మెల్యేలు గ్రామాల్లోనే ఉండి ఈ ప్రక్రియను పర్యవేక్షించాలని సూచించారు.
తెలంగాణ శాసనసభలో జరుగుతున్న ఆధునీకరణ పనుల పరిశీలన అనంతరం సీఎం రేవంత్ రెడ్డి మీడియా ప్రతినిధులతో నిర్వహించిన చిట్చాట్లో బీఆర్ఎస్, బీజేపీ లపై తీవ్రస్థాయిలో ధ్వజమెత్తారు. గత బీఆర్ఎస్ పాలనలో జరిగిన వైఫల్యాలను ఎండగడుతూనే, ప్రస్తుత రాజకీయ పరిణామాలు, ఓటర్ల జాబితా ప్రక్షాళన (SIR) ప్రక్రియపై స్పష్టమైన వ్యాఖ్యలు చేశారు. రాజకీయ ప్రత్యర్థుల విమర్శలను తిప్పికొడుతూ, గత ప్రభుత్వంలో జరిగిన అక్రమాలు, కేంద్ర ప్రభుత్వ తీరుపై ఆయన విరుచుకుపడ్డారు.
తనకు రెండు చోట్ల ఓట్లు ఉన్నాయంటూ బీఆర్ఎస్, బీజేపీ నేతలు చేస్తున్న ఆరోపణలను ముఖ్యమంత్రి తీవ్రంగా ఖండించారు. తాను నిబంధనల ప్రకారమే, సంబంధిత కలెక్టర్ ముందస్తు అనుమతితో స్వగ్రామంలో ఉన్న ఓటును కొడంగల్కు బదిలీ చేసుకున్నానని స్పష్టం చేశారు. చరిత్ర, భూగోళం తెలియకుండా “బలిసి ఏది పడితే అది మాట్లాడుతున్నారు” అంటూ ఘాటుగా విమర్శించారు. గతంలో కొడంగల్, గద్వాల, అలంపూర్ ప్రాంతాలు కర్ణాటక పరిధిలో ఉండేవి అని, భాషాప్రయుక్త రాష్ట్రాల విభజన సమయానికే అవి పాలమూరులో కలిశాయని గుర్తుచేశారు.
గత బీఆర్ఎస్ ప్రభుత్వంలో జరిగిన ఇంటర్మీడియట్ ఫలితాల వివాదం, గ్లోబరీనా సంస్థ వైఫల్యాలను సీఎం రేవంత్ రెడ్డి ప్రత్యేకంగా ప్రస్తావించారు. గ్లోబరీనా సంస్థ కేటీఆర్ బినామీ సంస్థ అని ఆరోపిస్తూ, ఆ సంస్థ చేసిన పొరపాట్ల వల్లే పలువురు విద్యార్థులు ఆత్మహత్యలకు పాల్పడ్డారని వాపోయారు. ఇంటర్, పదో తరగతి, గ్రూప్-1 క్వశ్చన్ పేపర్ల లీకేజీలు, మార్కుల కేటాయింపుల్లో అక్రమాలపై కేటీఆర్ తెలంగాణ అమరవీరుల స్తూపం వద్ద ముక్కు నేలకు రాసి ప్రజలకు క్షమాపణలు చెప్పాలని డిమాండ్ చేశారు. జన్వాడ ఫామ్ హౌస్ భూములు,గ్లోబరీనా వెనుక ఉన్న శక్తులపై తీవ్ర విమర్శలు గుప్పించారు.
దేశవ్యాప్తంగా సంచలనం సృష్టిస్తున్న నీట్ (NEET) ప్రశ్నపత్రాల లీకేజీ వ్యవహారంలో కేంద్ర విద్యాశాఖ మంత్రి ధర్మేంద్ర ప్రధాన్ వెంటనే రాజీనామా చేయాలని ముఖ్యమంత్రి రేవంత్ రెడ్డి డిమాండ్ చేశారు. కేంద్రంలోని బీజేపీ ప్రభుత్వాన్ని ఈ విషయంలో నిలదీయకుండా బీఆర్ఎస్ నేతలు మౌనం వహించడం వెనుక వారిద్దరి మధ్య ఉన్న అంతర్గత కుమ్మక్కు స్పష్టంగా కనిపిస్తోందని ఆరోపించారు. కేంద్రంతో ఉన్న ఈ అవగాహన వల్లే బీఆర్ఎస్ నాయకులు నీట్ కుంభకోణంపై ధర్నాలు చేయడం లేదని విమర్శించారు.
కాళేశ్వరం ప్రాజెక్టులోని మేడిగడ్డ బ్యారేజీ వైఫల్యాన్ని కప్పిపుచ్చుకునేందుకే బీఆర్ఎస్ నేతలు ఇప్పుడు ‘కన్నెపల్లి పంపుహౌస్’ పేరును వాడుతున్నారని సీఎం ఎద్దేవా చేశారు. ప్రజల్లోకి వెళ్లి మేడిగడ్డ అని చెప్తే చెప్పులతో కొడతారనే భయంతోనే వారు పంపుహౌస్ పేరు ఎత్తుతున్నారని అన్నారు. నేషనల్ డ్యామ్ సేఫ్టీ అథారిటీ (NDSA), జస్టిస్ పి.సి. ఘోష్ కమిషన్ , విజిలెన్స్ నివేదికల ఆధారంగా అక్రమార్కులను జైలుకు పంపే అధికారం సీబీఐకి ఉందని, అయితే సీబీఐతో లోపాయికారీ ఒప్పందాలు చేసుకుని తప్పించుకోవాలని బీఆర్ఎస్ చూస్తోందని ఆరోపించారు.
హైదరాబాద్లోని కబ్జాలు, ఆక్రమణలపై ‘హైడ్రా’ (HYDRAA) అద్భుతమైన పనితీరును కనబరుస్తోందని సీఎం కొనియాడారు. ఎంతటి ప్రతిష్టాత్మక లేదా రాజకీయ నేపథ్యం ఉన్న వ్యక్తులైనా సరే ఆక్రమణలను ఉపేక్షించేది లేదని స్పష్టం చేశారు. అలాగే భద్రాచలం ప్రాంతంలోని ఐదు గ్రామ పంచాయతీలను గతంలో ఏపీకి కట్టబెట్టడం వల్ల ఇప్పుడు భద్రాచలంలో అభివృద్ధికి, చెత్త వేయడానికి కూడా స్థలం లేని పరిస్థితి ఏర్పడిందని, ఆ ప్రాంతాలను తిరిగి తెలంగాణలో కలపాలనే ప్రతిపాదనలు సిద్ధం చేస్తున్నామని తెలిపారు.
పార్లమెంట్ ఎన్నికల ఫలితాలను విశ్లేషిస్తూ సీఎం రేవంత్ రెడ్డి, బీఆర్ఎస్, బీజేపీల రహస్య బంధాన్ని మరోసారి లేవనెత్తారు. మాజీ సీఎం కేసీఆర్ ప్రాతినిధ్యం వహించే,ఆయన కుటుంబ సభ్యులు ఉన్న అసెంబ్లీ నియోజకవర్గాల్లో కూడా లోక్సభ ఎన్నికల్లో బీజేపీకే అత్యధిక మెజార్టీ వచ్చిందని గుర్తుచేశారు. సిద్దిపేట, మెదక్ లోక్సభ స్థానాల్లో బీఆర్ఎస్ ఓట్లను బీజేపీకి బదిలీ చేసి, తెలంగాణలో బీఆర్ఎస్ తన ఉనికిని కోల్పోతూ బీజేపీకి లబ్ధి చేకూర్చేలా వ్యవహరించిందని సంచలన ఆరోపణలు చేశారు.
కాంగ్రెస్ ప్రభుత్వం ఇచ్చిన ఉద్యోగ ప్రకటనలు (నోటిఫికేషన్లు), చేపట్టిన నియామకాలపై శాసనసభ వేదికగానైనా, బయటైనా తాము సమగ్ర చర్చకు సిద్ధంగా ఉన్నామని సవాలు విసిరారు. గత బీఆర్ఎస్ పాలనలో కేవలం కేసీఆర్ కుటుంబంలో ఉన్నవారికే పదవులు, ఉద్యోగాలు దక్కాయని, కానీ కాంగ్రెస్ అధికారంలోకి వచ్చాక వేలాది మంది నిరుద్యోగ యువతకు పారదర్శకంగా ఉద్యోగాలు కల్పించామని స్పష్టం చేశారు. పేదలకు ఇందిరమ్మ ఇళ్ల నిర్మాణం కోసం ఇచ్చిన మాట ప్రకారం ₹5 లక్షల సహాయాన్ని త్వరలోనే అందిస్తామని హామీ ఇచ్చారు.
ముగింపుగా, రాబోయే గ్రామ పంచాయతీ ఎన్నికల్లో రెండు మూడో వంతు (2/3rd) స్థానాలను కాంగ్రెస్ పార్టీ గెలుచుకోవడం ఖాయమని సీఎం రేవంత్ రెడ్డి ధీమా వ్యక్తం చేశారు. కేటీఆర్ బర్త్డే వేడుకల గురించి ప్రస్తావిస్తూ “కేటీఆర్ దావత్ ఇస్తే ఆయనవి వేరే పార్టీలు కాబట్టి నేను తీసుకోలేను” అని వ్యంగ్యాస్త్రాలు విసిరారు. ప్రభుత్వం అమలు చేస్తున్న ప్రజా సంక్షేమ పథకాలు, పాలనా సంస్కరణలు కాంగ్రెస్ పార్టీని ప్రజాదరణలో ముందంజలో ఉంచాయని, తాము ఏది చెప్తే అది చేసి తీరుతామని ఆయన పునరుద్ఘాటించారు.
