
ఆర్టిఫిషియల్ ఇంటెలిజెన్స్ రాకతో ప్రపంచవ్యాప్తంగా అన్ని రంగాల్లో వేగవంతమైన మార్పులు చోటుచేసుకుంటున్నాయి. ముఖ్యంగా వైద్య రంగంలో ఏఐ అద్భుతాలు సృష్టించబోతోందని టెక్ దిగ్గజాలు బలంగా విశ్వసిస్తున్నారు. మరో పదేళ్లలో క్యాన్సర్, అల్జీమర్స్, గుండె జబ్బులు, తీవ్రమైన మానసిక సమస్యలు వంటి ప్రాణాంతక వ్యాధులు పూర్తిగా అంతరించిపోతాయని ప్రముఖ ఏఐ సంస్థ ఆంథ్రోపిక్ సీఈవో డారియో అమోడెయ్ సంచలన వ్యాఖ్యలు చేశారు. వాషింగ్టన్లో మాట్లాడిన ఆయన, ఏఐ సాయంతో మానవాళి శతాబ్దాలుగా ఎదుర్కొంటున్న ఆరోగ్య సమస్యలకు త్వరలోనే శాశ్వత పరిష్కారం లభించనుందని ధీమా వ్యక్తం చేశారు.
వైద్య పరిశోధనలు, కొత్త ఔషధాల ఆవిష్కరణ ప్రక్రియను కృత్రిమ మేధ మనం ఊహించలేనంత వేగంగా ముందుకు తీసుకెళ్తుందని అమోడెయ్ వివరించారు. సాధారణంగా ఒక కొత్త మందును కనుగొనడానికి, దానిపై ప్రయోగాలు చేసి మార్కెట్లోకి తీసుకురావడానికి దశాబ్దాల సమయం పడుతుంది. కానీ ఏఐ సాంకేతికత వల్ల జీవశాస్త్ర పరిశోధనలు మరింత సులభతరం అవుతున్నాయని, రాబోయే దశాబ్ద కాలంలోనే క్యాన్సర్ వంటి భయంకరమైన వ్యాధులు కేవలం గతకాలపు జ్ఞాపకాలుగా మాత్రమే మిగిలిపోతాయని ఆశాభావం వ్యక్తం చేశారు. అదే గనుక జరిగితే మానవ చరిత్రలోనే అదొక అతిపెద్ద విజయంగా నిలిచిపోతుందని పేర్కొన్నారు.
Also Read : ట్రంప్కు ఇరాన్ మాస్టర్ షాక్.. భూగర్భంలో అదృశ్య క్షిపణుల సామ్రాజ్యం.. అసలు ప్లాన్ ఏంటి?
ఈ అభిప్రాయం కేవలం డారియో అమోడెయ్ ఒక్కరిదే కాదు. కృత్రిమ మేధ రంగంలో అగ్రగాములుగా పేరుగాంచిన ఎలాన్ మస్క్, గూగుల్ డీప్మైండ్ సీఈవో డెమిస్ హస్సాబిస్ కూడా ఇదే విషయాన్ని సమర్థిస్తున్నారు. పదేళ్ల పాటు సాగే క్లిష్టమైన ఔషధ పరిశోధనలను కృత్రిమ మేధ సాయంతో కేవలం కొన్ని వారాల్లోనే పూర్తి చేయవచ్చని డెమిస్ హస్సాబిస్ స్పష్టం చేశారు. ఏఐ సాంకేతికత ద్వారా రాబోయే పదేళ్లలో దాదాపు అన్ని రకాల వ్యాధులకు కచ్చితమైన చికిత్స, మందులు అందుబాటులోకి వస్తాయని ఆయన అంచనా వేస్తున్నారు.
ఇందుకు ప్రత్యక్ష ఉదాహరణగా ఆల్ఫాఫోల్డ్ అనే ఏఐ ఆవిష్కరణను శాస్త్రవేత్తలు చూపిస్తున్నారు. మన శరీరంలోని కణాల పనితీరుకు, వ్యాధులు రావడానికి ప్రొటీన్ల నిర్మాణం అత్యంత కీలకం. గతంలో ఒక ప్రొటీన్ నిర్మాణాన్ని సాధారణ పద్ధతుల్లో గుర్తించాలంటే శాస్త్రవేత్తలకు కొన్ని నెలల నుంచి సంవత్సరాల సమయం పట్టేది. కానీ, ఆల్ఫాఫోల్డ్ ఏఐ వ్యవస్థ ఇప్పటివరకు ఏకంగా 20 కోట్ల ప్రొటీన్ల నిర్మాణాలను కేవలం కొన్ని నిమిషాల్లోనే కచ్చితంగా అంచనా వేసి వాటి 3డీ ఆకృతులను శాస్త్రవేత్తల ముందుంచింది. వ్యాధి సోకినప్పుడు ప్రొటీన్లలో కలిగే మార్పులను ఇది విడమర్చి చెబుతుండటంతో వాటికి తగిన మందులను తయారు చేయడం ఇప్పుడు చాలా సులభమైంది. ఆల్ఫాఫోల్డ్ అనేది ఆధునిక కాలంలో ఒక గొప్ప శాస్త్రీయ విజయమని హస్సాబిస్ కొనియాడారు.
అయితే ఏఐ నిపుణుల ఈ అంచనాలపై ప్రముఖ ఔషధ తయారీ సంస్థలు భిన్నంగా స్పందిస్తున్నాయి. కృత్రిమ మేధ వల్ల పరిశోధనల వేగం పెరుగుతుందనే విషయాన్ని అంగీకరిస్తూనే కేవలం పదేళ్లలోనే క్యాన్సర్ వంటి క్లిష్టమైన వ్యాధులు పూర్తిగా అంతమవుతాయనడం కేవలం అత్యుత్సాహం మాత్రమేనని అవి తోసిపుచ్చుతున్నాయి. మానవ శరీరం అత్యంత సంక్లిష్టమైనదని, ఏఐ సూచించే ఔషధాలు మనుషులపై ఎలా పనిచేస్తాయో తెలుసుకోవడానికి క్లినికల్ ట్రయల్స్, ప్రభుత్వ అనుమతులు వంటి ఎన్నో దశలు ఉంటాయని ఫార్మా నిపుణులు గుర్తుచేస్తున్నారు. ఏది ఏమైనప్పటికీ ఏఐ రాకతో వైద్య రంగంలో ఒక కొత్త శకం మొదలైందనడంలో మాత్రం ఎలాంటి సందేహం లేదు.
Also Read : పాక్ మాజీ ప్రధాని ఇమ్రాన్ ఖాన్కు ఆపరేషన్.. అర్ధరాత్రి ఆస్పత్రికి









