China: అంతర్జాతీయ ఆర్థిక వ్యవస్థలో తన ఆధిపత్యాన్ని మరింత పెంచుకునేందుకు, అలాగే అమెరికా డాలర్ నిర్మించిన సామ్రాజ్యానికి గండి కొట్టేందుకు చైనా అధ్యక్షుడు షీ జిన్పింగ్ అత్యంత రహస్యంగా, అసాధారణమైన వ్యూహాన్ని అమలు చేస్తున్నారు. ఇందులో భాగంగానే చైనా గత 20 నెలలుగా విరామం లేకుండా టన్నుల కొద్దీ బంగారాన్ని కొనుగోలు చేస్తూ తన అమ్ములపొదిని నింపుకుంటోంది. అధికారికంగా ఇటీవల జూన్ నెలలోనే ఏకంగా 173 టన్నుల పసిడిని సేకరించడం ప్రపంచ దేశాలను ఆశ్చర్యానికి గురిచేసింది.
చైనా పీపుల్స్ బ్యాంక్ (PBOC) విడుదల చేసిన అధికారిక గణాంకాల ప్రకారం, ఆ దేశ అధికారిక పసిడి నిల్వలు ప్రస్తుతం 2,346 టన్నులకు చేరాయి. భారతీయ కరెన్సీ ప్రకారం వీటి విలువ దాదాపు ₹34 లక్షల కోట్లుగా అంచనా. ఈ భారీ కొనుగోళ్ల ఫలితంగా ప్రపంచంలోనే అత్యధికంగా పసిడి నిల్వలు ఉన్న దేశాల జాబితాలో చైనా ఐదో స్థానానికి ఎగబాకి రష్యాను సవాల్ చేస్తోంది. ప్రస్తుతం అమెరికా, జర్మనీ, ఇటలీ, ఫ్రాన్స్ మాత్రమే చైనా కంటే ముందు వరుసలో ఉన్నాయి.
చైనా ఈ స్థాయిలో పసిడిని సేకరించడం వెనుక ఉన్న ప్రధాన లక్ష్యం డాలర్ రూపంలో ఉండే తన విదేశీ మార్పిడి నిల్వల నిష్పత్తిని తగ్గించడమే. ప్రస్తుతం చైనా వద్ద ప్రపంచంలోనే అతిపెద్దదైన 3 ట్రిలియన్ డాలర్ల ఫారెక్స్ రిజర్వులు ఉన్నాయి. రేపటి రోజున అమెರಿಕాతో ఏదైనా తీవ్ర భౌగోళిక రాజకీయ వివాదం (ఉదాహరణకు తైవాన్ సమస్య) తలెత్తితే, రష్యాపై విధించినట్లుగానే తమ విదేశీ నిల్వలపై కూడా అమెరికా ఆర్థిక ఆంక్షలు విధించే ప్రమాదం ఉందని చైనా భావిస్తోంది. అందుకే డాలర్ రూపంలో ఉన్న ఆస్తులను బంగారంగా మారుస్తోంది.
డాలర్పై ఆధారపడటం తగ్గించడం ద్వారా చైనా తన స్వంత కరెన్సీ అయిన ‘యువాన్’ అంతర్జాతీయ హోదాను పెంచాలని యోచిస్తోంది. భారీగా పసిడి నిల్వలు ఉన్నాయని ప్రపంచ దేశాలకు చూపిస్తే, యువాన్కు బంగారంతో బలమైన బ్యాకింగ్ ఉందనే నమ్మకం ఇతర దేశాల్లో కలుగుతుంది. దీనివల్ల గ్లోబల్ ట్రేడ్లో డాలర్ స్థానంలో యువాన్ను అంగీకరించేందుకు ఇతర దేశాలు ముందుకు వస్తాయి. ఇది అంతర్జాతీయ వ్యాపారంలో డాలర్ కాలాన్ని క్రమంగా ముగించే ‘డి-డాలరైజేషన్’ వ్యూహంలో భాగం.
చరిత్రను తిరగేస్తే, అమెరికా డాలర్పై తిరుగుబాటు చేయడం ఇది మొదటిసారి కాదు. 1965లో ఫ్రాన్స్ మాజీ అధ్యక్షుడు చార్లెస్ డి గాల్ అమెరికా ఆర్థిక బ్లాక్మెయిలింగ్ను నిరసిస్తూ, తమ వద్ద ఉన్న డాలర్ల నిల్వలతో నేరుగా అమెరికా నుంచే రహస్యంగా పసిడిని కొనుగోలు చేయడం ప్రారంభించారు. దీనిని గుర్తించిన అమెరికా అధ్యక్షుడు రిచర్డ్ నిక్సన్ 1971లో డాలర్ను పసిడితో ముడిపెట్టే వ్యవస్థను రద్దు చేశారు. ఆనాటి నుంచే డాలర్కు పసిడి కొనుగోలు వ్యూహం అతిపెద్ద బలహీనతగా మారింది.
Also Read : 24 గంటల నాన్ స్టాప్ జర్నీ.. చరిత్ర సృష్టించిన క్వాంటాస్ ఎయిర్లైన్స్ ఎయిర్బస్
చైనా వద్ద కేవలం అధికారికంగా ప్రకటించిన 2,346 టన్నుల పసిడి మాత్రమే కాకుండా, భారీగా ‘రహస్య బంగారం’ కూడా ఉందనే వార్తలు తీవ్ర సంచలనం సృష్టిస్తున్నాయి. ప్రముఖ ఫైనాన్షియల్ సంస్థ గోల్డ్మన్ శాక్స్ అంచనా ప్రకారం చైనా మిలట్రీ, లోకల్ ట్రెజరీల వద్ద సుమారు 5,500 టన్నుల రహస్య పసిడి (Underground Gold) దాగి ఉంది. ఈ ప్రైవేట్, సీక్రెట్ నిల్వలను కూడా కలిపితే చైనా మొత్తం బంగారం నిల్వలు 7,846 టన్నులకు చేరతాయి. ఇది అమెరికా వద్ద ఉన్న 8,133 టన్నుల అధికారిక నిల్వలకు అత్యంత చేరువగా ఉండటం గమనార్హం.
మరోవైపు, పసిడి కొనుగోలు వెనుక చైనా దేశీయ ఆర్థిక సమస్యలు కూడా దాగి ఉన్నాయి. చైనా ఆర్థిక వ్యవస్థ వృద్ధి రేటు ప్రస్తుతం తీవ్రంగా మందగిస్తోంది. గతంలో 7 శాతం పైగా ఉన్న వృద్ధి రేటు, ఇటీవల 4.3 శాతానికి పడిపోయింది. ఆస్తి రరంగంలో సంక్షోభం (Real Estate Crisis), పెరుగుతున్న ప్రభుత్వ అప్పులు చైనాను కుదిపేస్తున్నాయి. ఇలాంటి క్లిష్ట సమయంలో బంగారం అనేది ఆర్థిక వ్యవస్థను కుప్పకూలిపోకుండా కాపాడే ఒక బలమైన రక్షణ కవచంలా పనిచేస్తుంది.
వృద్ధి రేటు తగ్గినప్పటికీ, ప్రపంచ స్థాయి పెట్టుబడిదారులలో చైనా ఆర్థిక వ్యవస్థపై నమ్మకం సన్నగిల్లకుండా చూసేందుకు పసిడి సాయపడుతుంది. ఎంతటి ఆర్థిక సంక్షోభం వచ్చినా, లేదా తమ కరెన్సీ విలువ క్షీణించినా, పసిడి నిల్వల వల్ల మార్కెట్లో ప్రతికూల వాతావరణం (Negative Sentiment) ఏర్పడదు. అందుకే షీ జిన్పింగ్ ప్రభుత్వం పసిడి సేకరణను అత్యంత ప్రాధాన్యత కలిగిన అంశంగా భావిస్తోంది.
ఈ ఆధునిక వ్యూహం వెనుక చైనా పురాతన రాజనీతి తత్వశాస్త్రం “గువాంజీ” (Guanzi) ప్రభావం స్పష్టంగా కనిపిస్తోంది. ప్రాచీన చైనా ఆర్థిక విధానమైన గువాంజీ ప్రకారం—ఒక దేశ పాలకుడు ఎల్లప్పుడూ ధాన్యాన్ని, విలువైన లోహాలను (పసిడి) గరిష్టంగా నిల్వ చేయాలి. సంక్షోభాలు, కరువులు లేదా యుద్ధాలు సంభవించినప్పుడు సైన్యం నిర్వహణకు, ఆర్థిక స్థిరత్వానికి ఈ పసిడి నిల్వలే ప్రధానాధారంగా నిలుస్తాయి.
సంక్షిప్తంగా చెప్పాలంటే, చైనా చేపడుతున్న ఈ భారీ పసిడి సేకరణ కేవలం ఒక సాధారణ పెట్టుబడి మాత్రమే కాదు. ఇది భవిష్యత్తులో సంభవించే ఆర్థిక యుద్ధాలకు, అమెరికా ఆధిపత్యానికి చరమగీతం పాడేందుకు, ప్రపంచ ఆర్థిక వ్యవస్థకు కొత్త నాయకత్వం వహించేందుకు షీ జిన్పింగ్ సిద్ధం చేస్తున్న సుదీర్ఘMaster plan. రాబోయే ఐదేళ్లలో చైనా పసిడి నిల్వలు అధికారికంగా అమెరికాను అధిగమించినా ఆశ్చర్యపోనవసరం లేదు.
Also Read : ఇండియన్స్కు ఊరట.. అమెరికా గ్రీన్ కార్డ్ బిల్లులో కీలక ప్రతిపాదనలు..!
