Italy : ఇటలీ ప్రభుత్వం కీలక నిర్ణయం తీసుకుంది. పాఠశాలల్లో బుర్ఖా, నిఖాబ్ ధరించడాన్ని నిషేధించింది. అలాగే ఇటాలియన్ భాష సరిగ్గా రాని విదేశీ విద్యార్థుల సంఖ్యను ఒక్కో తరగతిలో 30 శాతానికి మించకుండా పరిమితం చేయాలని నిర్ణయించింది. ఇటలీ ప్రధాని జార్జియా మెలోనీ నేతృత్వంలోని కేబినెట్ ఈ నిర్ణయం తీసుకుంది. ఒక తరగతిలో ఇటాలియన్ భాష సరిగ్గా రాని విద్యార్థులు 30 శాతానికి మించకూడదు. వారు ఇటాలియన్ భాష బాగా నేర్చుకునేందుకు మరిన్ని అవకాశాలు కల్పిస్తాం. పాఠశాలల్లో బుర్ఖా, నిఖాబ్ ధరించడాన్ని కూడా నిషేధిస్తున్నాం అని మెలోనీ సోషల్ మీడియాలో తెలిపారు.
ఒక విద్యార్థి పాఠశాలలో ఇతర పిల్లలతో కలవడంలో చాలా ఇబ్బంది పడుతున్నట్లు గుర్తిస్తే, ఆ విషయాన్ని సామాజిక సేవల అధికారులకు తెలియజేస్తారు. ఆ విద్యార్థి తల్లిదండ్రులు ఉచితంగా నిర్వహించే ఇటాలియన్ భాష తరగతులకు తప్పనిసరిగా హాజరుకావాలి. ఈ నిబంధనను పాటించకపోతే 1,000 యూరోల వరకు జరిమానా విధించే అవకాశం ఉంది.
Also Read : పాక్ ప్రధానికి కౌంటర్ ఇచ్చిన పేటల్ గహ్లోత్ ఎవరు?
ఇటలీలో వలసలు, వలస వచ్చిన వారి పిల్లల చదువు ప్రస్తుతం ముఖ్యమైన రాజకీయ అంశాలుగా మారాయి. వచ్చే ఏడాది సాధారణ ఎన్నికలు జరగనున్న నేపథ్యంలో ఈ అంశంపై చర్చ మరింత పెరిగింది. అయితే ఇటలీ ప్రభుత్వం తీసుకున్న ఈ నిర్ణయంపై సేవ్ ద చిల్డ్రన్ సంస్థ ఆందోళన వ్యక్తం చేసింది. పిల్లలు ఇటాలియన్ భాష సరిగ్గా మాట్లాడలేకపోతున్నారని లేదా వారు ఏ దేశానికి చెందిన వారనే కారణంతో వారిని వేరే పాఠశాలలకు పంపడం సరికాదని చెప్పింది. ఇలా చేస్తే పిల్లల మధ్య తేడాలు పెరిగే అవకాశం ఉందని పేర్కొంది. అయితే ఇటలీ విద్యాశాఖ మంత్రి జ్యూసెప్పే వాల్దితారా మాత్రం ఇటాలియన్ భాష సరిగ్గా రాకపోతే పిల్లల చదువుపై ప్రభావం పడుతుందని చెప్పారు. పిల్లల చదువులో తల్లిదండ్రులు కూడా భాగస్వాములు కావడం చాలా ముఖ్యమని అన్నారు.
మెలోనీ ప్రభుత్వ నిర్ణయాన్ని ప్రతిపక్ష నేత ఎల్లీ ష్లీన్ విమర్శించారు. పిల్లలను లక్ష్యంగా చేసుకుని ప్రభుత్వం అనవసరమైన చర్యలు తీసుకుంటోందని ఆరోపించారు. పాఠశాలల్లో బుర్ఖా, నిఖాబ్ నిషేధంపై మెలోనీ మాట్లాడుతూ ఇది భద్రతకు సంబంధించిన విషయమని చెప్పారు. ఒక మహిళ లేదా చిన్నారి తన ముఖాన్ని పూర్తిగా కప్పుకోవాల్సి వస్తే, వారి ప్రాథమిక హక్కులకు ఇబ్బంది కలుగుతుందని ఆమె అన్నారు. సమాజంలో అందరితో కలిసిపోవడానికి కూడా ఇది అడ్డంకిగా మారుతుందని చెప్పారు.
పాఠశాలల్లో బుర్ఖా వాడకంపై చర్యలు తీసుకోవాలని నేషనల్ ఫ్యూచర్ పార్టీ గత జూలైలోనే డిమాండ్ చేసింది. ఈ పార్టీ మెలోనీ ప్రభుత్వంలో భాగం కాదు. మెలోనీ పార్టీ కంటే మరింత కఠినమైన వైఖరితో ఉన్న ఈ పార్టీ ఫిబ్రవరిలో ప్రారంభమైన తర్వాత ఇటలీలో తన మద్దతును పెంచుకుంటోంది. ఇటీవలి సర్వేల్లో కూడా ఆ పార్టీకి మద్దతు పెరిగినట్లు తెలుస్తోంది.
Also Read : ఘోర విమాన ప్రమాదం.. ఇద్దరు సీనియర్ ఆర్మీ అధికారులతో సహా 14 మంది మృతి
