USA : అమెరికా ప్రభుత్వం పౌరసత్వం విషయంలో కీలక నిర్ణయం తీసుకుంది. ఇప్పటివరకు చేపట్టిన అతిపెద్ద పౌరసత్వం రద్దు చర్యను ప్రారంభించినట్లు అమెరికా న్యాయ శాఖ ప్రకటించింది. ఈ చర్యలో భాగంగా అమెరికా పౌరసత్వం పొందిన 40 మందిపై చర్యలు తీసుకుంటున్నారు. వీరిలో భారత సంతతికి చెందిన ఒక వ్యక్తి కూడా ఉన్నారు. వీరి పౌరసత్వాన్ని రద్దు చేయాలని అమెరికాలోని పలు ఫెడరల్ కోర్టుల్లో కేసులు నడుస్తున్నాయి. ఈ 40 మందిపై తీవ్రమైన ఆరోపణలు ఉన్నాయి. విదేశీ ప్రభుత్వాల కోసం ఏజెంట్లుగా పనిచేయడం, ఉద్దేశపూర్వకంగా ఒక వ్యక్తి మరణానికి కారణం కావడం, ప్రత్యేక అవసరాలు ఉన్న వ్యక్తిపై లైంగిక దాడికి పాల్పడటం వంటి ఆరోపణలు ఉన్నాయి.
అమెరికా ఇమ్మిగ్రేషన్ అండ్ నేషనాలిటీ యాక్ట్ ప్రకారం.. ఒక వ్యక్తి మోసం చేసి, ముఖ్యమైన విషయాలను దాచిపెట్టి లేదా తప్పుడు సమాచారం ఇచ్చి అమెరికా పౌరసత్వం పొందినట్లు తేలితే, ఆ పౌరసత్వాన్ని రద్దు చేయవచ్చు. అలాగే వారికి ఇచ్చిన పౌరసత్వ ధ్రువపత్రాన్ని కూడా రద్దు చేసే అవకాశం ఉంది. అమెరికా న్యాయ శాఖ వివరాల ప్రకారం.. బాల్విందర్ సింగ్ 1992లో బాల్విందర్ సింగ్ పేరుతో ఇమ్మిగ్రేషన్ దరఖాస్తు చేసుకున్నారు. ఆ తర్వాత 2003లో మరో గుర్తింపుతో శాశ్వత నివాస హోదా కోసం దరఖాస్తు చేసి పొందారు. రెండు దరఖాస్తుల్లోనూ ఒకే వ్యక్తి వేలిముద్రలు ఉన్నట్లు అధికారులు గుర్తించారు.
2009లో ఆయన రెండో గుర్తింపుతో అమెరికా పౌరసత్వం పొందినట్లు న్యాయ శాఖ తెలిపింది. తప్పుడు సమాచారం ఇవ్వడం, చట్టవిరుద్ధమైన చర్యలకు పాల్పడటం వంటి మొత్తం ఏడు ఆరోపణలు ఆయనపై ఉన్నాయని పేర్కొంది. ఇవన్నీ ఆయన నైతిక ప్రవర్తనపై ప్రభావం చూపే విషయాలని కోర్టుకు సమర్పించిన ఫిర్యాదులో తెలిపింది. ఇదే సమయంలో చైనాలో పుట్టిన మాజీ అమెరికా నేవీ ఉద్యోగి జిన్‌చావో వెయ్‌ పౌరసత్వాన్ని కూడా రద్దు చేసేందుకు అమెరికా ప్రభుత్వం చర్యలు తీసుకుంటోంది. ఆయనపై గతంలో గూఢచర్యానికి సంబంధించిన కేసులో శిక్ష పడింది.
అధికారిక వివరాల ప్రకారం.. వెయ్‌ 2021లో అమెరికా నేవీలో చేరారు. 2022 ఫిబ్రవరిలో చైనాకు సైనిక రహస్య సమాచారాన్ని అమ్మేందుకు కుట్ర చేసినట్లు ఆరోపణలు వచ్చాయి. అమెరికా సైన్యంలో గౌరవంగా పనిచేసిన వారికి త్వరగా పౌరసత్వం ఇచ్చే నిబంధనల కింద ఆయన 2022 మేలో అమెరికా పౌరసత్వం పొందారు. ఇక పాకిస్థాన్, మెక్సికో, కంబోడియా, నేపాల్, అఫ్గానిస్థాన్‌కు చెందిన పలువురిపై కూడా ఇలాంటి కేసులు ప్రారంభించినట్లు అమెరికా న్యాయ శాఖ తెలిపింది. తప్పుడు సమాచారం ఇవ్వడం, ముఖ్యమైన విషయాలను దాచిపెట్టడం లేదా మోసం చేయడం ద్వారా అమెరికా పౌరసత్వం పొందినట్లు ఆరోపణలు ఎదుర్కొంటున్న మొత్తం 40 మంది పౌరులపై ఈ చర్యలు కొనసాగుతున్నాయి.
