Gold Prices
Gold Prices

గత కొంతకాలంగా ఆకాశాన్నంటుతూ సామాన్యులకు అందనంత ఎత్తుకు చేరిన బంగారం, వెండి ధరలు ఇప్పుడు క్రమంగా దిగొస్తున్నాయి. దేశీయ మార్కెట్‌లో ఈ రెండు లోహాల ధరలు గణనీయంగా తగ్గుముఖం పట్టడంతో కొనుగోలుదారుల్లో మళ్లీ ఆశలు చిగురిస్తున్నాయి. అంతర్జాతీయ మార్కెట్‌లో చోటుచేసుకుంటున్న ఆర్థిక పరిణామాలు నేరుగా మన దేశీయ బులియన్ మార్కెట్‌పై ప్రభావం చూపుతున్నాయి. ఈ రోజు ఉదయం 10 గంటల సమయానికి హైదరాబాద్ బులియన్ మార్కెట్‌లో ధరలు భారీగా తగ్గాయి.

స్వచ్ఛమైన 24 క్యారెట్ల 10 గ్రాముల మేలిమి బంగారం ధర రూ.1,42,350 వద్ద ట్రేడవుతోంది. క్రితం రోజు ధరతో పోలిస్తే ఒక్కరోజే పుత్తడి ధర దాదాపు రూ.1,400 మేర తగ్గడం విశేషం. నవంబరు 4వ తేదీ తర్వాత బంగారం ధర ఈ స్థాయిలో దిగిరావడం మళ్లీ ఇప్పుడే కావడం గమనార్హం. బంగారం బాటలోనే వెండి కూడా పయనిస్తూ కొనుగోలుదారులకు భారీ ఊరటనిచ్చింది. బుధవారం నాటి ధరతో పోలిస్తే కిలో వెండి ధర ఏకంగా రూ.3,000లకు పైగా తగ్గి, ప్రస్తుతం హైదరాబాద్ విపణిలో రూ.1,86,550 పలుకుతోంది. పెళ్లిళ్ల సీజన్ నడుస్తున్న తరుణంలో ఇలా ధరలు తగ్గడం ఆభరణాలు కొనుగోలు చేయాలనుకునే కుటుంబాలకు ఎంతో కలిసొచ్చే అంశం.

Also Read : వాట్సాప్‌లో సరికొత్త ఫీచర్.. ఇకపై ఆల్ ఇన్ వన్ యాప్‌గా మారనున్న చాటింగ్ యాప్.. ఎలాగంటే?

మరోవైపు ఫ్యూచర్స్ మార్కెట్ అయిన మల్టీ కమొడిటీ ఎక్స్ఛేంజీలో కూడా బంగారం, వెండి ధరలు భారీ ఒత్తిడిని ఎదుర్కొంటున్నాయి. అదేవిధంగా కేజీ వెండి ధర కూడా రూ.1.82 లక్షలకు దిగొచ్చింది. అంతర్జాతీయ విపణిలో కూడా ఇదే తరహా తగ్గుదల స్పష్టంగా కనిపిస్తోంది. ప్రపంచ మార్కెట్‌లో స్పాట్ గోల్డ్ ఔన్సు ధర 3,974 డాలర్ల వద్ద కొనసాగుతుండగా.. ఔన్సు వెండి ధర 51.48 డాలర్లకు పరిమితమైంది. అంతర్జాతీయంగా డిమాండ్ తగ్గడం వల్ల స్పాట్ మార్కెట్‌తో పాటు ఫ్యూచర్స్ మార్కెట్‌లోనూ లోహాల ధరలు నేలచూపులు చూస్తున్నాయి.

ఈ ధరల తగ్గుదల వెనుక ఉన్న అత్యంత కీలకమైన కారణం అమెరికన్ డాలర్ విలువ అనూహ్యంగా పుంజుకోవడమే. అంతర్జాతీయ మార్కెట్‌లో డాలర్ విలువ గత 19 నెలల గరిష్ఠ స్థాయికి చేరుకుంది. సాధారణంగా ప్రపంచవ్యాప్తంగా బంగారం, వెండి లావాదేవీలన్నీ డాలర్లలోనే జరుగుతుంటాయి. ఎప్పుడైతే డాలర్ విలువ బలపడుతుందో, అప్పుడు ఇతర దేశాల కరెన్సీలలో బంగారం, వెండిని కొనుగోలు చేయడం చాలా ఖరీదైన వ్యవహారంగా మారుతుంది. దీనివల్ల ఇతర దేశాల నుంచి కొనుగోళ్లు తగ్గిపోయి, సహజంగానే అంతర్జాతీయంగా డిమాండ్ పడిపోతుంది. దీనికి తోడు వచ్చే నెలలో అమెరికా ఫెడరల్ రిజర్వ్ వడ్డీ రేట్లను పెంచవచ్చన్న వార్తలు ఇన్వెస్టర్ల సెంటిమెంట్‌ను దెబ్బతీశాయి. వడ్డీ రేట్లు పెరిగితే బాండ్లపై రాబడి పెరుగుతుంది. కాబట్టి వడ్డీ ఆదాయం లేని బంగారంపై పెట్టుబడులు తగ్గుతాయి. ఈ పరిణామాలన్నీ కలిసి రానున్న మరికొన్ని రోజుల పాటు బంగారం, వెండి ధరలపై ఒత్తిడిని కొనసాగించే అవకాశం ఉందని మార్కెట్ నిపుణులు అంటున్నారు.

Also Read : లేఆఫ్స్ కలకలం.. భారత్‌లో 1000 మంది తొలగింపు