The Paradise : నాని హీరోగా శ్రీకాంత్ ఓదెల దర్శకత్వంలో తెరకెక్కిన ‘ది ప్యారడైజ్’ చిత్రం విడుదలై మూడు రోజులైనప్పటికీ ఏమాత్రం దూకుడు తగ్గలేదు. తొలి రెండు రోజులు మిశ్రమ స్పందన వచ్చినప్పటికీ వసూళ్లు మాత్రం ఏ మాత్రం తగ్గలేదు. మూడో రోజు దానికి భిన్నంగా పాజిటివ్‌ టాక్ రావడంతో మరింత పుంజుకుంది. నిజానికి సినిమా విడుదలైనప్పటి నుంచి బాక్సాఫీస్ దగ్గర రికార్డు స్థాయి వసూళ్లు రాబ‌ట్టడం గమనార్హం. ట్రేడ్ వర్గాల సమాచారం ప్రకారం ‘ది ప్యారడైజ్’ రెండు రోజుల్లోనే ప్రపంచవ్యాప్తంగా రూ.115 కోట్లకు పైగా గ్రాస్ వసూళ్లు సాధించినట్లు చెబుతున్నారు. ఇక మూడో రోజు అడ్వాన్స్ బుకింగ్స్ మరింత పెరిగి సినిమాకు మంచి స్పందన ఉన్న విషయాన్ని రుజువు చేస్తున్నాయి. ప్రముఖ టికెట్ బుకింగ్ వేదిక బుక్ మై షోలో మూడో రోజు ‘ది ప్యారడైజ్’కు గణనీయమైన బుకింగ్స్ నమోదైనట్లు తెలుస్తోంది. మూడో రోజు సుమారు 2.52 లక్షల టికెట్లు విక్రయించినట్లు ఆ సంస్థ వెల్లడించింది.
నాని గత చిత్రాలతో పోలిస్తే ఈ సినిమా భారీ అంచనాలతో విడుదల కావడం, ముందస్తు బుకింగ్స్‌కు మంచి స్పందన రావడంతో ప్రారంభ వసూళ్లు భారీగా పెరిగినట్లు తెలుస్తోంది. అయితే తొలి వారంలో సినిమా ఏ స్థాయిలో నిలబడుతుందనేది చిత్రం వసూళ్లకు కీలకం కానున్నది. ప్రారంభ వసూళ్లు భారీగా ఉండటం ఒక అంశమైతే.. రోజులు గడిచేకొద్దీ థియేటర్లలో ఆక్యుపెన్సీని కొనసాగించడం మరింత కీలకం కానున్నది. మూడో రోజు బుకింగ్స్ రెండో రోజుకు దగ్గరగా ఉండటం ప్రస్తుతానికి సినిమాకు సానుకూల సంకేతమనే చెప్పాలి. ఇదిలా ఉంటే ‘ది ప్యారడైజ్’ చిత్రబృందం తాజాగా మీడియా సమావేశంలో పాల్గొని సినిమాకు సంబంధించిన అనుభవాలను పంచుకోవడంతో సినిమాకు మరింత హైప్‌ వచ్చింది.
కాగా, దర్శకుడు శ్రీకాంత్ సినిమా తెరకెక్కించిన విధానం, షూటింగ్ సమయంలో ఎదురైన అనుభవాలు, ప్రేక్షకుల నుంచి వస్తున్న స్పందన వంటి అంశాలపై చిత్రబృందం ఏర్పాటు చేసిన మీడియా సమావేశంలో పంచుకున్నారు. సినిమా విడుదల తర్వాత వస్తున్న భిన్నాభిప్రాయాలపై కూడా చిత్రబృందం తమ అభిప్రాయాలను మీడియా ఎదుట వెల్లడించింది. ప్రస్తుతం ‘ది ప్యారడైజ్’కు అసలు పరీక్ష మొదటి వారం ముగిసే సమయానికి ఎదురు కానుంది. రెండు రోజుల్లో రూ.115 కోట్లకు పైగా గ్రాస్ సాధించినట్లు వస్తున్న ట్రేడ్ లెక్కలు, మూడో రోజు కూడా 2.52 లక్షల టికెట్ల బుకింగ్స్ నమోదవడం సినిమా విజయవంతానికి సంకేతమైనప్పటికీ వసూళ్ల పరంగా మరింత పుంజుకోవలసి ఉందని ట్రేడ్ వర్గాలు అభిప్రాయపడుతున్నాయి. అయినా మూడో రోజు కూడా బుకింగ్స్‌లో పెద్దగా తగ్గుదల కనిపించకపోవడంతో నాని అభిమానుల్లో ఉత్సాహం పెంచింది. ఇప్పుడు వారాంతపు వసూళ్లు ఎలా ఉంటాయి? తొలి వారం పూర్తయ్యే సరికి సినిమా ఎంత వసూలు చేస్తుంది? అనేది ఉత్కంఠగా మారింది.
