ప్రపంచవ్యాప్తంగా టెక్ రంగంలో అత్యంత ప్రాచుర్యం పొందిన ‘ఆర్టిఫిషియల్ ఇంటెలిజెన్స్’ (AI) పదంపై అమెరికా అధ్యక్షుడు డొనాల్డ్ ట్రంప్ సంచలన నిర్ణయం తీసుకున్నారు. అధికారిక ప్రభుత్వ పత్రాలు, రికార్డుల్లో ‘ఏఐ’ అనే పదాన్ని పూర్తిగా నిషేధిస్తున్నట్లు ప్రకటించారు. దానికి బదులుగా ఇకపై ‘సూపర్ ఇంటెలిజెన్స్’ (Super Intelligence – SI) అనే కొత్త పదాన్ని వాడాలని ఆయన ఆదేశాలు జారీ చేశారు.
ట్రంప్ అభిప్రాయం ప్రకారం.. ‘ఆర్టిఫిషియల్’ అనే పదం ప్రస్తుత టెక్నాలజీ యొక్క అపారమైన సామర్థ్యాన్ని, దాని పవర్‌ను సరిగ్గా ప్రతిబింబించడం లేదు. కేవలం కృత్రిమమైనదిగా కాకుండా, అత్యున్నత శక్తి సామర్థ్యాలు కలిగిన సాంకేతికతగా దీనిని చూడాలని ఆయన భావిస్తున్నారు. అందుకే ఈ టెక్నాలజీకి మరింత ప్రాధాన్యతనిచ్చేలా ‘సూపర్ ఇంటెలిజెన్స్’ అనే పేరును తెరపైకి తెచ్చారు. వాస్తవానికి ఏఐ పేరు మార్చాలన్న ఈ ప్రతిపాదనను ట్రంప్ గత నెలలోనే ప్రస్తావించగా, తాజాగా దాన్ని అధికారికంగా అమలులోకి తెస్తూ ఉత్తర్వులు ఇచ్చారు.
ఈ నిర్ణయంతో అమెరికాలోని అన్ని ప్రభుత్వ విభాగాలు, ఫెడరల్ ఏజెన్సీలు తమ అధికారిక డాక్యుమెంట్లు, కమ్యూనికేషన్స్, ప్రాజెక్టుల్లో ‘ఆర్టిఫిషియల్ ఇంటెలిజెన్స్’ లేదా ‘AI’ అనే పదాలను వాడకూడదు. వాటి స్థానంలో తప్పనిసరిగా ‘సూపర్ ఇంటెలిజెన్స్’ లేదా ‘SI’ అనే పదాలనే ఉపయోగించాల్సి ఉంటుంది.
గ్లోబల్ స్థాయిలో అందరూ రోజూ వాడే ఒక పాపులర్ టెక్నికల్ టర్మ్‌ను మార్చేయాలని ట్రంప్ ఆదేశించడం ఇప్పుడు అంతర్జాతీయ టెక్ వర్గాల్లో పెద్ద ఎత్తున చర్చకు దారితీసింది. ప్రపంచమంతా ఏఐ అని పిలుస్తుంటే, అమెరికా అడ్మినిస్ట్రేషన్ మాత్రం అధికారికంగా ‘ఎస్‌ఐ’ వైపు అడుగులు వేయడం ఒక సరికొత్త మార్పుగా నిలుస్తోంది.
