Dhanush : తమిళనాడు రాజకీయాలు ఎప్పుడూ సినీ గ్లామర్తో ముడిపడి ఉంటాయి. ఎంజీఆర్, కరుణానిధి, జయలలిత కాలం నుండి నేటి వరకు కోలీవుడ్ ప్రభావం రాజకీయాలపై స్పష్టంగా కనిపిస్తూనే ఉంది. ఇటీవలి కాలంలో స్టార్ హీరో విజయ్ తన ‘తమిళగ వెట్రి కళగం’ (TVK) పార్టీతో రాజకీయాల్లోకి అడుగుపెట్టడం, మొదటి ఎన్నికల్లోనే సంచలన విజయం సాధించి ముఖ్యమంత్రి పీఠాన్ని అధిరోహించడం తమిళనాట సరికొత్త రాజకీయ అధ్యాయానికి తెరలేపింది. విజయ్ రోజువారీ పాలనా నిర్ణయాలు, సంక్షేమ పథకాలు ప్రస్తుతం రాష్ట్రవ్యాప్తంగా హాట్ టాపిక్గా మారాయి.
విజయ్ సీఎం అయ్యాక తన పాలనపై పట్టు పెంచుకుంటూ, ప్రజల మనసు గెలుచుకునేలా కొన్ని సంచలన, సమర్థవంతమైన నిర్ణయాలు తీసుకుంటున్నారు. యువతను, సామాన్య ప్రజలను ఆకట్టుకుంటూ ఆయన సాగిస్తున్న ప్రయాణం కోలీవుడ్లోని ఇతర హీరోలకు కూడా సరికొత్త స్ఫూర్తిని ఇస్తోంది. ఈ నేపథ్యంలోనే తమిళనాడు రాజకీయ యవనికపై మరో స్టార్ హీరో పేరు ప్రముఖంగా వినిపించడం మొదలైంది. ఆయనే వైవిధ్యమైన నటనతో జాతీయ స్థాయిలో గుర్తింపు తెచ్చుకున్న నటుడు ధనుష్.
ప్రస్తుతం కోలీవుడ్ సర్కిల్స్లో ధనుష్ రాజకీయ అరంగేట్రం గురించిన వార్తలు జోరుగా షికారు చేస్తున్నాయి. దీనికి ప్రధాన కారణం ఆయన ఇటీవలి కాలంలో తన అభిమాన సంఘాల (Dhanush Fans Associations) నెట్వర్క్ను ఒక్కసారిగా యాక్టివ్ చేయడమే. కేవలం సినిమాలకే పరిమితం కాకుండా, రాష్ట్రవ్యాప్తంగా ఉన్న తన అభిమానులను విస్తృతంగా సామాజిక సేవా కార్యక్రమాల్లో పాల్గొనాల్సిందిగా ధనుష్ స్వయంగా సూచించడం ఈ ఊహాగానాలకు బలాన్ని చేకూరుస్తోంది.
Also Read : మణిపూర్లో తీవ్రవాదుల ఘాతుకం: ఇద్దరు జవాన్లు మృతి!
ఈ ప్రచారానికి మరింత ఆజ్యం పోసేలా, ధనుష్ ఇటీవల తమిళనాడు మాజీ ముఖ్యమంత్రి, డీఎంకే (DMK) అధినేత ఎం.కె. స్టాలిన్ను మర్యాదపూర్వకంగా కలవడం రాజకీయ వర్గాల్లో తీవ్ర చర్చనీయాంశమైంది. ఇది కేవలం సాధారణ భేటీ అని ధనుష్ వర్గాలు చెబుతున్నప్పటికీ, రాబోయే అసెంబ్లీ ఎన్నికలను దృష్టిలో ఉంచుకునే ధనుష్ గ్రౌండ్ లెవల్లో ప్రజలకు దగ్గరయ్యేలా ముందస్తు ప్రణాళికలు రచిస్తున్నారని విశ్లేషకులు భావిస్తున్నారు.
అయితే, ధనుష్ నిజంగానే ప్రత్యక్ష రాజకీయాల్లోకి వస్తారా? లేక విజయ్ తరహాలోనే కొత్త రాజకీయ పార్టీని స్థాపిస్తారా? లేదా డీఎంకే వంటి బలమైన ప్రాంతీయ పార్టీలో కీలక బాధ్యతలు స్వీకరిస్తారా? అనే ప్రశ్నలకు ప్రస్తుతానికైతే స్పష్టమైన సమాధానం లేదు. విజయ్ సాధించిన అపూర్వ విజయం, రికార్డులను ధనుష్ కూడా రిపీట్ చేయగలరా అనేది ఆయన రాజకీయ వ్యూహాలు, ప్రజల్లో ఆయనకు ఉండే ఆదరణపైనే ఆధారపడి ఉంటుంది.
ఈ పొలిటికల్ ఎంట్రీ వార్తలపై ధనుష్ టీమ్ నుండి గానీ, ఆయన నుండి గానీ ఇప్పటివరకు ఎలాంటి అధికారిక ప్రకటన వెలువడలేదు. కేవలం సామాజిక సేవా కార్యక్రమాల కోసమే అభిమానులను రంగంలోకి దించారా, లేక దీని వెనుక ఏదైనా పెద్ద పొలిటికల్ స్కెచ్ ఉందా అనేది తెలియాల్సి ఉంది. వైరల్ అవుతున్న ఈ వార్తలపై ధనుష్ త్వరలోనే స్పందించి పూర్తి వివరణ ఇస్తారేమోనని అటు అభిమానులు, ఇటు రాజకీయ విశ్లేషకులు ఎంతో ఆసక్తిగా ఎదురుచూస్తున్నారు.
Also Read : విరిగిపడ్డ కొండచరియలు: ఒకే కుటుంబంలో ముగ్గురు మృతి!
