సాధారణంగా ఐఆర్సీటీసీ వెబ్సైట్ లేదా యాప్ ద్వారా ఆన్లైన్లో రైలు టికెట్ బుక్ చేసుకునే సమయంలో ట్రావెల్ ఇన్సూరెన్స్ కావాలా? అనే ఒక ఆప్షన్ కనిపిస్తుంది. దీని ధర కేవలం 45 పైసలు మాత్రమే. చాలామంది రూపాయి కంటే తక్కువే కదా అని దాన్ని పెద్దగా పట్టించుకోరు. దీంతో టిక్ చేయకుండా మరిచిపోతుంటారు. కానీ కేవలం ఆ 45 పైసల ఇన్సూరెన్స్ ద్వారా ప్రయాణంలో ఏదైనా ప్రమాదం జరిగితే ఏకంగా రూ. 10 లక్షల వరకు బీమా పరిహారం పొందవచ్చనే విషయం చాలామందికి తెలియదు.
నేటి డిజిటల్ యుగంలో ఇ-కామర్స్ పోర్టల్స్, ట్రావెల్ ప్లాట్ఫారమ్లు తమ కస్టమర్ల కోసం ‘ఎంబెడెడ్ ఇన్సూరెన్స్’ విధానాన్ని విస్తృతంగా అమలు చేస్తున్నాయి. అంటే విడిగా ఎలాంటి బీమా పాలసీలు తీసుకోనవసరం లేకుండా సేవలు పొందే సమయంలోనే అతి తక్కువ ధరకే భద్రతను కల్పిస్తాయి. భారతీయ రైల్వే కూడా ప్రయాణికుల రక్షణ, ఆర్థిక భద్రతను దృష్టిలో ఉంచుకుని ఈ అద్భుతమైన సేవను అందిస్తోంది.
ఈ 45 పైసల ట్రావెల్ ఇన్సూరెన్స్ వల్ల ప్రయాణికులకు లేదా వారి కుటుంబానికి అనేక ఆర్థిక ప్రయోజనాలు చేకూరుతాయి. రైలు ప్రమాదంలో ప్రయాణికుడు మరణించినా లేదా తీవ్రంగా గాయపడి శాశ్వత అంగవైకల్యానికి గురైనా గరిష్టంగా రూ. 10 లక్షల పరిహారం చెల్లిస్తారు. ఒకవేళ ప్రమాదం వల్ల శరీరంలో ఏదైనా భాగం పాక్షికంగా వైకల్యానికి గురైతే రూ. 7.5 లక్షల వరకు బీమా అందుతుంది. అలాగే గాయపడి ఆసుపత్రిలో చికిత్స పొందే వారికి వైద్య ఖర్చుల కోసం రూ. 2 లక్షల వరకు అందిస్తారు. ప్రమాదవశాత్తు ప్రయాణికుడు మరణిస్తే, భౌతికకాయాన్ని స్వగ్రామానికి తరలించడానికి అదనంగా రూ.10,000 వరకు ఇస్తారు.
ఈ ఇన్సూరెన్స్ ప్రయోజనాన్ని పొందడం చాలా సులభం. రైలు టికెట్ బుక్ చేసే సమయంలో ‘Opt for Travel Insurance’ అనే బాక్స్ను ఎంచుకోవాలి. టికెట్ బుకింగ్ పూర్తయిన తర్వాత సంబంధిత బీమా కంపెనీ నుండి మీ ఫోన్ లేదా ఈమెయిల్కు ఒక లింక్ వస్తుంది. ఆ లింక్పై క్లిక్ చేసి మీ నామినీ వివరాలను నమోదు చేసుకోవాలి. నామినీ వివరాలు ఇవ్వడం వల్ల భవిష్యత్తులో ఏమైనా జరగరానిది జరిగితే క్లెయిమ్ చేసుకోవడం చాలా వేగంగా, సులభంగా పూర్తవుతుంది.
ఈ ఇన్సూరెన్స్ సౌకర్యం కేవలం భారతీయ పౌరులకు, ఆన్లైన్ ద్వారా కన్ఫార్మ్డ్ లేదా ఆర్ఏసీ టికెట్లు బుక్ చేసుకున్న వారికి మాత్రమే వర్తిస్తుంది. కేవలం 45 పైసల చిన్న మొత్తంతో మన కుటుంబానికి పెద్ద కొండంత అండ లభిస్తుంది. కాబట్టి ఇకపై రైలు ప్రయాణం చేసేటప్పుడు ఈ ఇన్సూరెన్స్ ఆప్షన్ను ఎప్పుడూ వదిలేయకండి.
