Explainer: హిందూ మహాసముద్రం, ఇండో-పసిఫిక్ ప్రాంతంలో చైనా ఆధిపత్యానికి చెక్ పెట్టేందుకు భారత్ మరో భారీ వ్యూహాత్మక అడుగు వేసింది. ఇండోనేషియాలోని అత్యంత కీలకమైన ‘సబాంగ్’ (Sabang) ఓడరేవును సంయుక్తంగా అభివృద్ధి చేసేందుకు భారత ప్రభుత్వం ఇండోనేషియాతో ఒప్పందం కుదుర్చుకుంది. ప్రపంచంలోనే అత్యంత రద్దీగా ఉండే మలాక్కా జలసంధి (Strait of Malacca) సమీపంలో ఉన్న ఈ పోర్ట్ అభివృద్ధి ద్వారా భారత్ అంతర్జాతీయ నౌకా రవాణా రంగంలో పట్టు సాధించడమే కాకుండా, వ్యూహాత్మకంగా చైనాకు ఊహించని షాక్ ఇచ్చింది.
ఇండోనేషియాలోని సుమత్రా దీవి ఉత్తర కొనన ఉన్న సబాంగ్ పోర్ట్, భారత్ నిర్మిస్తున్న ‘గ్రేట్ నికోబార్’ ట్రాన్స్షిప్మెంట్ పోర్ట్కు కేవలం 160 కిలోమీటర్ల దూరంలో ఉంది. ఇది మలాక్కా జలసంధి ప్రవేశ ద్వారం వద్ద ఉంది.మలాక్కా జలసంధి చైనాకు ఆర్థికంగా అత్యంత కీలకం. చైనా దిగుమతి చేసుకునే ముడిచమురులో సుమారు 80 శాతం, మొత్తం వర్తకంలో 60 శాతం ఈ ఇరుకైన జలసంధి ద్వారానే వెళుతుంది.సబాంగ్ పోర్ట్ను అభివృద్ధి చేయడం ద్వారా మలాక్కా జలసంధికి రెండు వైపులా (ఒకవైపు గ్రేట్ నికోబార్, మరోవైపు సబాంగ్) భారత్ తన వ్యూహాత్మక పట్టును సాధిస్తుంది. యుద్ధం లేదా అత్యవసర పరిస్థితులు వస్తే చైనా చమురు సరఫరాను అడ్డుకునే శక్తి భారత్కు లభిస్తుంది.
Also Read : భారత్-ఇండోనేషియా బిగ్ డీల్స్.. డెఫెన్స్ నుంచి టెక్నాలజీ వరకు కుదుర్చుకున్న ఒప్పందాలివే!
ప్రస్తుతం సబాంగ్ పోర్ట్ సుమారు 50,000 టన్నుల బరువున్న నౌకలను మాత్రమే నిలిపే సామర్థ్యం కలిగి ఉంది. అయితే దీనిని ఆగ్నేయాసియాలోని చిన్న ఓడరేవులకు సరుకులను పంపిణీ చేసే ప్రాంతీయ ‘ట్రాన్స్షిప్మెంట్ హబ్’గా తీర్చిదిద్దడమే భారత్ యొక్క సుదీర్ఘ ప్రణాళిక.నేషనల్ సీమాంటిక్ ఫౌండేషన్ మాజీ డైరెక్టర్ విజయ్ సఖూజా ప్రకారం.. సబాంగ్ పోర్ట్ను కోల్కతా, చిట్టగాంగ్ (బాంగ్లాదేశ్), యాంగూన్ (మయాన్మార్) వంటి బంగాళాఖాత పోర్టులతో అనుసంధానించవచ్చు. అలాగే హల్దియా, దావే పోర్టుల ద్వారా ఇంధనం, బొగ్గు, ఇనుప ఖనిజం, ధాన్యాల రవాణాకు దీనిని కేంద్రంగా ఉపయోగించుకోవచ్చు. ఇది అధికారికంగా వాణిజ్య ప్రాజెక్ట్గా ఉన్నప్పటికీ, భవిష్యత్తులో భారత నౌకాదళం (Indian Navy) పెట్రోలింగ్, రీఫ్యూయెలింగ్ (ఇంధనం నింపుకోవడం), మరమ్మతులు మరియు విపత్తు సహాయక చర్యల కోసం ఫార్వర్డ్ లాజిస్టిక్స్ బేస్గా ఉపయోగించుకునే అవకాశం ఉంది.
ఈ ప్రాజెక్ట్ భారత్ యొక్క ‘యాక్ట్ ఈస్ట్’ (Act East Policy) విదేశాంగ విధానాన్ని మరింత బలోపేతం చేస్తుంది. అండమాన్ నికోబార్ దీవులకు, ఇండోనేషియాలోని ‘ఆచే’ (Aceh) ప్రావిన్స్కు మధ్య సముద్ర అనుసంధానాన్ని పెంచడం ద్వారా బంగాళాఖాతంలో వర్తకం, పర్యాటకం, లాజిస్టిక్స్ రంగాలు అభివృద్ధి చెందుతాయి.2018లో భారత్-ఇండోనేషియాలు కుదుర్చుకున్న ‘ఇండో-పసిఫిక్లో సముద్ర సహకార భాగస్వామ్యం’ ఆధారంగా ఈ ప్రాజెక్టు పట్టాలెక్కింది. 2023లోనే సబాంగ్ అభివృద్ధిపై ఇరు దేశాలు సంయుక్త సాధ్యాసాధ్యాల అధ్యయనాన్ని (Feasibility Study) పూర్తి చేశాయి. సబాంగ్, గ్రేట్ నికోబార్ పోర్టులను పరస్పర అనుబంధ హబ్లుగా తీర్చిదిద్దడం ద్వారా హిందూ మహాసముద్రంలో భారత్ సముద్ర భద్రతను, ఆర్థిక ప్రాభావాన్ని గణనీయంగా పెంచుకోనుంది.
Also Read : అమెరికా-ఇరాన్ సీజ్ఫైర్.. హార్ముజ్లో 3 ట్యాంకర్లపై దాడులు!
