తెలంగాణ రాష్ట్రంలో ఆదివారం వేర్వేరు ప్రాంతాలలో రెండు ఘోర రోడ్డు ప్రమాదాలు(Road Accident) సంభవించాయి. జాతీయ రహదారులపై జరిగిన ఈ ప్రమాదాలలో ఒకచోట నలుగురు దుర్మరణం పాలవ్వగా.. మరొకచోట ప్రైవేట్ ట్రావెల్స్ బస్సు బోల్తా పడి పది మంది ప్రయాణికులు తీవ్రంగా గాయపడ్డారు. ఈ రెండు ప్రమాదాలకు సంబంధించిన పూర్తి వివరాలు ఇలా ఉన్నాయి.

నల్గొండ జిల్లా చిట్యాల మండలం పెద్దకాపర్తి వద్ద జాతీయ రహదారిపై అత్యంత విషాదకర సంఘటన చోటుచేసుకుంది. ఆదివారం తెల్లవారుజామున ప్రయాణికులతో హైదరాబాద్ వైపు వెళ్తున్న ఒక కారును, అదే మార్గంలో వస్తున్న ఓ ప్రైవేట్ ట్రావెల్స్ బస్సు వెనుక నుంచి అత్యంత వేగంగా ఢీకొట్టింది.ఈ ప్రమాద ధాటికి కారు పూర్తిగా నుజ్జునుజ్జయ్యింది. కారులో ప్రయాణిస్తున్న వారిలో ఎనిమిదేళ్ల బాలుడితో సహా నలుగురు అక్కడికక్కడే ప్రాణాలు కోల్పోయారు. ప్రమాద సమయంలో కారులో ఉన్న మరొక వ్యక్తి తీవ్రంగా గాయపడ్డారు. స్థానికులు, పోలీసులు వెంటనే స్పందించి క్షతగాత్రుడిని చికిత్స నిమిత్తం సమీపంలోని ఆసుపత్రికి తరలించారు. ప్రస్తుతం అతని పరిస్థితి విషమంగా ఉన్నట్లు తెలుస్తోంది. పోలీసులు కేసు నమోదు చేసుకుని దర్యాప్తు చేస్తున్నారు.

Also Read : సాయికృష్ణ మృతి కేసులో బిగ్‌ట్విస్ట్‌.. కృష్ణలంక పీఎస్ టెర్రస్‌పై ఎముకలు, బూడిద..

గద్వాల జిల్లాలో లారీని ఢీకొట్టి బోల్తా పడ్డ ప్రైవేట్ బస్సు

మరో ప్రమాదంలో.. జోగులాంబ గద్వాల జిల్లా పరిధిలో ప్రైవేట్ ట్రావెల్స్ బస్సు అదుపుతప్పి బోల్తా పడింది. శనివారం రాత్రి అనంతపురం జిల్లా హిందూపూర్ నుంచి హైదరాబాద్‌కు 22 మంది ప్రయాణికులతో ‘మార్నింగ్ స్టార్’ ట్రావెల్స్‌కు చెందిన ప్రైవేట్ బస్సు బయలుదేరింది. ఆదివారం తెల్లవారుజామున ఈ బస్సు గద్వాల జిల్లాలోని మానవపాడు స్టేజి సమీపానికి చేరుకోగానే, జాతీయ రహదారిపై ముందు వెళ్తున్న లారీని వెనుక నుంచి బలంగా ఢీకొట్టింది. ఢీకొట్టిన వేగానికి బస్సు డ్రైవర్ నియంత్రణ కోల్పోవడంతో వాహనం రోడ్డుపైనే అదుపుతప్పి బోల్తా పడింది.

ప్రమాదం జరిగిన సమయంలో బస్సులో ఉన్న ప్రయాణికులు భయాందోళనలతో కేకలు వేశారు. ఈ ఘటనలో మొత్తం 10 మంది ప్రయాణికులకు తీవ్ర గాయాలయ్యాయి. ప్రమాద సమాచారం అందుకున్న వెంటనే హైవే పెట్రోలింగ్ పోలీసులు, స్థానికులు ఘటనా స్థలానికి చేరుకుని బస్సు అద్దాలు పగులగొట్టి ప్రయాణికులను బయటకు తీశారు. గాయపడిన వారందరినీ అత్యవసర చికిత్స నిమిత్తం ఏపీలోని కర్నూలు ప్రభుత్వ సర్వజన ఆసుపత్రికి (GGH) తరలించారు. బాధితుల్లో కొందరి పరిస్థితి ఆందోళనకరంగా ఉన్నట్లు సమాచారం. వీకెండ్ (సెలవు దినాలు) కావడంతో జాతీయ రహదారులపై వాహనాల రద్దీ పెరిగింది. దీనికి తోడు తెల్లవారుజామున వచ్చే నిద్రమత్తు, మితిమీరిన వేగం కారణంగానే ఈ ప్రమాదాలు జరుగుతున్నాయని, వాహనదారులు సుదీర్ఘ ప్రయాణాల్లో అప్రమత్తంగా ఉండాలని పోలీసులు సూచిస్తున్నారు.

Also Read : ప్రియుడి మోజులో కట్టుకున్నోడిని లేపేసింది..అనకాపల్లిలో దారుణం !