ప్రస్తుతం దేశవ్యాప్తంగా వీధి కుక్కలు దాడులు చేస్తున్నాయి. చిన్న పిల్లల నుంచి వృద్ధుల వరకు ఎంతో మంది ఈ కుక్కల బారిన పడి తీవ్రంగా గాయపడుతున్నారు. కొన్నిసార్లు ప్రాణాలు కూడా కోల్పోతున్నారు. ఈ క్రమంలోనే కేరళకు చెందిన కొందరు ఇంజినీరింగ్ విద్యార్థులు ఒక వినూత్నమైన ఆలోచనతో ముందుకొచ్చారు. వీధి కుక్కల దాడి నుంచి ప్రజలను రక్షించే ఒక సరికొత్త స్మార్ట్ వాచ్ను వారు తయారు చేస్తున్నారు.
చెంగనూర్ విద్యార్థుల వినూత్న ప్రయోగం
కేరళలోని చెంగనూర్లో ఉన్న ‘సెయింట్ థామస్ కాలేజ్ ఆఫ్ ఇంజినీరింగ్ అండ్ టెక్నాలజీ’కి చెందిన విద్యార్థుల బృందం ఈ స్మార్ట్ వాచ్ను అభివృద్ధి చేస్తోంది. ప్రస్తుతం ఈ ప్రాజెక్ట్ చివరి దశకు చేరుకుంది. ఈ వాచ్ నమూనాకు విద్యార్థులు ‘సెన్స్-కె9’ అని పేరు పెట్టారు. సాధారణంగా వీధిలో వెళ్తున్నప్పుడు కుక్కలు వింతగా ప్రవర్తించినా లేదా మనపైకి కరవడానికి దూసుకొచ్చినా ఈ వాచ్ మనల్ని కాపాడుతుంది.
ఈ స్మార్ట్ వాచ్ ఎలా పనిచేస్తుందంటే?
మనం రోడ్డుపై వెళ్లేటప్పుడు ఏదైనా కుక్క దాడి చేయడానికి వస్తే.. వెంటనే ఈ స్మార్ట్ వాచ్కు ఉన్న ఒక ప్రత్యేకమైన బటన్ను నొక్కాల్సి ఉంటుంది. ఆ బటన్ నొక్కగానే ఈ వాచ్ నుండి 20 నుంచి 40 కిలోహెర్జ్ సామర్థ్యం గల అల్ట్రాసోనిక్ ధ్వని తరంగాలు విడుదలవుతాయి. ఈ ధ్వని తరంగాలు మనుషులకు వినపడవు. కానీ కుక్కలకు చాలా స్పష్టంగా, ఇబ్బందికరంగా వినిపిస్తాయి. ఆ శబ్దానికి భయపడి లేదా తట్టుకోలేక వీధి కుక్కలు అక్కడికక్కడే వెనక్కి తిరిగి పారిపోతాయి.
అందరికీ ఎంతో సురక్షితం
ఈ స్మార్ట్ వాచ్ చిన్న పిల్లలు, ఒంటరిగా వెళ్లే మహిళలు, రాత్రి వేళల్లో నడిచే వృద్ధులు, డ్యూటీలు చేసే ఉద్యోగులకు ఎంతగానో ఉపయోగపడుతుందని విద్యార్థుల బృందం చెబుతోంది. ఈ వాచ్ ద్వారా విడుదలయ్యే ధ్వని తరంగాలు కుక్కలకు ఎటువంటి శాశ్వత హాని కలిగించవని, కేవలం వాటిని భయపెట్టి పారిపోయేలా మాత్రమే చేస్తాయని వారు స్పష్టం చేశారు. అందువల్ల ఇది జంతువులకు కూడా పూర్తిగా సురక్షితమైనదే.
ప్రస్తుతం ప్రయోగాల దశ పూర్తి చేసుకుంటున్న ఈ ‘సెన్స్-కె9’ స్మార్ట్ వాచ్ త్వరలోనే మార్కెట్లోకి ప్రజలకు అందుబాటులోకి రానుంది. ఈ వాచ్ గనుక అందుబాటులోకి వస్తే దేశంలో వీధి కుక్కల కాటు సంఘటనలను చాలా వరకు అరికట్టవచ్చని నిపుణులు భావిస్తున్నారు.
